首頁 arrow 綠色短評 arrow 拜託楊志良署長千萬m7-thang誤會!

拜託楊志良署長千萬m7-thang誤會! PDF 列印 E-mail
發表者 李南衡   
2010/03/12, Friday
        一間大公司有一位小主管王主任,伊相當資深,伊經歷過chit間小公司按怎一步一步變到今仔日e5大公司,公司e5大細項代誌伊攏ma7知影,致使伊家己想講是總經理一人之下、眾員工之上,雖然伊講e5話、做e5事,定定tohhou7人氣kah面烏去;無一個人m7知王主任是一個無血無目屎e5硬漢!總是所有e5同事都攏忍伊三分,無人敢惹伊、當然ma7無人敢哼一聲。

        有一工人事室漏出一個消息講王主任最近有想beh提早退休。全公司e5大大細細攏歡喜kah嘴笑目笑。一下證實王主任做到幾月幾日為止,逐個拚勢為伊舉辦一個自了m7-bate5盛大「歡送會」,鬧熱滾滾,有影是逐家都歡歡喜喜beh ka7伊送出去!歡送會中總經理譤請王主任致詞,全公司e5人第一遍看tioh8王主任目眶紅,伊講:我非常非常感動,我是一個足無人緣e5人,我要求代誌傷過嚴格,一直想講逐個對我有敵意。無想tioh8今仔日會有chiah-呢隆重e5歡送會,hou7chiah呢大e5溫暖。我、我、我決定無beh辭職ah,我永遠beh kap逐個做夥拍拼,永遠無beh離開逐個!當場有五分之三e5員工暈倒去!

  三月初八下晡四點,衛生署長楊志良忽然間召開記者會宣佈辭職,主要原因是健保費起價問題,伊主張薪水兩萬四以上e5民眾健保費tioh8起,也就是四成一e5tioh8起健保費,一年會增加四百五十億e5收入。行政院指示tioh8照顧七成五e5民眾,也就是ka7兩成五e5人起健保費tioh8好。楊志良署長講伊無才調koh做落去,堅持beh辭職,害行政院吳敦義院長驚一下,ka7退伊e5辭呈退兩遍,講beh起健保費e5原則是一致,細節會tang3討論,免辭職。

  一個行政主管若是伊e5政策錯誤有問題、抑是伊e5政策人民be7 tang3接受、抑是伊e5主管無合意,無管伊e5官位大細,有擔當e5人唯一e5辦法就是辭職。因為台灣有骨頭e5行政主管愈來愈少,所以楊署長一下喝辭,逐個大聲ka7阿老、出力ka7phok仔。聽講伊e5聲勢忽然間chheng3懸起去。

        兩工後,馬英九總統佇中國國民黨中央黨部叫楊署長去搔頭殼搔五分鐘了後,楊署長講伊beh先請假,等三月十七去總統府專案報告了,再決定beh辭職抑m7。意思是講直屬主管行政院長無beh照我e5意思,我一下「張」講beh辭職,大頭家tioh8chhoe7我去搔頭殼,你行政院長算啥?人民ka7我拍phok仔、總統thin7我,我chiah呢偉大,那tioh8辭職?

  楊志良署長啊,拜託你千萬m7-thang誤會逐家是chan3你!你若自按呢大大扮扮koh坐佇衛生署長e5寶座,恐驚會笑破全台灣人e5嘴!
 
< 前一個   下一個 >