首頁 arrow 綠色短評 arrow 楊志良實在是好佳哉!

楊志良實在是好佳哉! PDF 列印 E-mail
發表者 李南衡   
2010/03/19, Friday

        三月十九新聞報導:北朝鮮舊年底實施一百換一箍、舊錢換新錢e5幣制改革,一夜之間物資大起,造成北朝鮮社會嚴重混亂。總理金英逸向人民會失禮。為tioh8 beh顧金日成屘仔子金正銀e5接班態勢,北朝鮮勞動黨前計劃財政部長朴南基,hong5當作替罪e5羊羔、承擔貨幣改革失敗e5責任,ti7頂禮拜hong5銃殺!驚死人哦,che干單佇獨裁專制國家才會發生,ma7 hong5tioh8e5衛生署長楊志良。

進口美國牛肉,談判了改作連牛腹內、牛目睭、一大堆有e5e5糞埽攏總會tang3進口,引起全國人民e5抗議,楊志良大聲講及美國協議好e5內容絕對be7使改,ma7無可能重新談判。結果,連中國國民黨籍e5立法委員ma7tioh8,緊修改食品衛生管理法來阻擋新e5美國牛肉進口方案,害美國hitphok8-phok8跳。衛生署長楊志良大嘴開開,伊敢有講beh辭職落台?無!楊志良實在是好佳哉,伊若佇北朝鮮早就砰一聲銃殺掉去ah

  衛生署講H1N1流行性感冒是偌呢厲害、偌呢恐怖!講進口e5疫苗無夠,因為全世界攏買無疫苗,若有,伊會使ka7你跪、十倍價數ka7你買,所以tioh8等國產e5「國光疫苗」生產好勢才會tang3做夥全面來種株。有人講to2一國生產傷濟、to2一國猶有疫苗thang賣。衛生署長楊志良大嘴開開、攏無講--按怎。伊講若無注疫苗,生命危險啥beh負責?有人注H1N1疫苗死去抑是破病,伊攏講及疫苗無關係。注疫苗死去e5人數煞比無注 tioh8 H1N1流行性感冒死去e5koh khah濟。楊志良署長大嘴開開無講beh負責。今年初伊講若無koh注第二筒無保障,逐個猶原驚kah m7敢去注。過兩工伊講H1N1無啥流行ah,無注無要緊。楊志良署長實在是好佳哉,伊若佇北朝鮮早就砰一聲銃殺掉去ah

  全民健保收費,衛生署長楊志良講行政院要求e5及伊提出e5be7合,伊無才調koh做落去ah!堅持向行政院長吳敦義提出兩遍辭呈。馬英九總統叫伊去搔頭殼,隨時改口供講等二代健保若立法通過伊就會退休。政策無法度落實,有骨頭e5政務官當然是辭職向人民會失禮。楊志良署長實在是好佳哉,伊若佇北朝鮮早就砰一聲銃殺掉去ah

  三月十八,國家通訊傳橎委員會(NCC)主委彭芸佇立法院hong5問去留問題,伊應講:「我面皮無楊志良hiah厚。」楊志良面皮偌厚?三寸、五寸抑是比犀牛皮khah厚,咱m7知。總是真厚應該是無問題。若佇北朝鮮早就砰一聲會hong5銃殺掉e5楊志良,實在是好佳哉,伊皮hiah厚砰be7死!
 
< 前一個   下一個 >