首頁 arrow 綠色短評 arrow 「二代健保」是啥碗糕?

「二代健保」是啥碗糕? PDF Print E-mail
Written by 李南衡   
Friday, 26 March 2010
        因為健保費起價方案行政院無照伊e5意思,衛生署長楊志良就堅持beh辭職,be7堪得hou7馬英九總統搔一下頭殼,反口供講,伊beh拚「二代健保」佇立法院本會期完成立法,階段性任務完成了後伊就會退休。

        老實講,楊志良署長behbeh留咱一點仔趣味都無,咱關心e5是伊講e5「二代健保」。台灣ti一九九五年三月,為tioh8增進全體台灣國民e5健康,照立法院通過e5《全民健康保險法》實施全民醫療保險制度。五年後民進黨執政,發現原本e5全民健保內底有真濟問題,所以ti7二00一年開始著手「二代健保規劃小組」,二00五年提出方案送立法院審查。可惜,立法院內底佔多數e5中國國民黨籍立委無愛hou7 chit-e5法案通過。

  民進黨政府提出e5二代健保就是beh ka7原本健保e5一寡缺失改掉,hou7台灣全民健保koh khah週全好勢。二代健保收費方式無koh照被保人職業別來分類,全部改以家戶總所得作收費基礎,m7是照原本一人算一口收費。若所得比下限khah低,就照戶內人口數(四口作上限),照下限金額繳費。原本e5健保,若是一個海外僑民轉來台灣就醫,凡若bat有健保紀錄,不管時轉來都隨時會使享受健保。二代健保規定回國就醫有一段等待期,佇台灣toa3六個月以上才會使享受健保,m7-na7公平kohtang3補一大孔健保漏洞、減少以億計算e5損失。健保局及醫療院所tioh8定期公布醫療品質相關資訊,一定規模以上e5病院tioh8公開健保相關e5財務報告。照當時民進黨政府所講e5,二代健保會tang3提高醫療品質,收費khah公平,而且簡化作業、效率ma7會提懸。

二代健保既然hiah呢好,是按怎hit當時佇立法院佔多數e5中國國民黨籍立委無beh hou7通過?敢是無愛hou7民進黨政府施政有好e5表現,才做出chit款為一黨之私犧牲全民利益e5代誌?抑是講因為chit-e5二代健保無好,才無beh hou7通過?若是無夠好,那會無欲提議修改,緊緊hou7通過早日實施咧?若是有影無愛hou7民進黨政府好表現,換中國國民黨執政了後,那會拖兩年猶m7 hou7立法通過,最近才koh加改一寡收費方法引起全民e5不滿?若是二代健保實在無好,衛生署長楊志良那會講behhou7過?行政院長吳敦義那會講二代健保是逐家所期待e5,希望兩年內,甚至koh-khah早完成立法工作?現此時佇立法院中國國民黨猶原佔絕對優勢,佇民進黨無可能反對e5情形下,是按怎馬英九總統已經拖兩年ah、講beh koh等兩年?是啥原因?有啥苦衷?

莫怪真濟人攏感覺足奇怪,會問講:二代健保是啥碗糕?

 
< Prev   Next >