首頁 arrow 綠色短評 arrow 敢講精彩會比建國khah精彩?

敢講精彩會比建國khah精彩? PDF 列印 E-mail
發表者 李南衡   
2010/04/02, Friday
        中華民國建國一百年活動標語是「中華民國,精彩一百」,Hong5感覺真奇怪,是按怎「建國」兩字煞phang3-kian3去咧?建國百年活動識別標誌(LOGO)設計者范可欽講,上代先teh討論e5時,主標語口號原本有「建國」chit兩字,ti7討論e5過程中希望會tang3「中性化」,所以才ka7「建國」兩字theh8掉。伊講chit-e5口號ui3開始想一直到做決定,經過三個外月,有聽過成百人e5意見,最後是「建國一百年基金會」請伊出主意定奪。「精彩」chit兩字確實伊想出來--e5,但是ma7有經過建國百年基金會幾個頭人一再討論才做決定。新聞報導講,建國百年慶祝活動籌備委員會內底,有一寡人真受氣范可欽佇外面烏白講話,講伊be7 tang3代表籌備委員會抑是基金會e5意見!

中華民國建國百年e5主標語竟然無「建國」chit兩字,內政部長江宜樺講按呢誠好ah,無一定愛講「建國」,因為「精彩」兩字就有包含hit-e5意涵。是按怎「精彩」就有包含「建國」e5意涵,咱學問無內政部長hiah飽,khahma7be7曉。好佳哉,台灣已經m7是戒嚴白色恐怖時期ah,若無,有可能命令見若有「建國」兩字e5tioh8改作「精彩」,建國科技大學改作精彩科技大學,建國中學改作精彩中學,建國小學改作精彩小學,建國南路、北路改作精彩南路、北路,當然建國花市ma7 tioh8改作精彩花市,建國Bi2-luh廠改作精彩bi2-luh廠等等,因為內政部長講精彩就有包含建國e5意涵。

事實上,khahhong5e5是,中國今年五月beh開始e5上海世界博覽會e5宣傳口號是:「成功奧運,精彩世博」,是m7是台灣連「建國」chit兩字都m7敢講,緊toe3中國e5口號講「精彩一百」?抑是等明年beh及中國做夥慶祝辛亥革命一百年?若照識別標誌設計者范可欽e5講法,為tioh8 beh hou7 chit-e5口號koh khah「中性化」,歸氣改一下khah有咧,主標題口號改作:「辛亥革命,精彩一百」,按呢國共兩黨就配合一百葩、合做一體ah,一定koh khah精彩。因為連「建國」都無愛講、m7敢用,順續ka7「中華民國」chit四字theh8-theh8掉,換作「辛亥革命」敢m7koh khah精彩?若是照內政部長所講「精彩」有包含「建國」e5涵意,相信「辛亥革命」koh khah有包含「中華民國」e5意涵。

若是中華民國政府驚中國驚kah chit款,連「建國」chit兩字都無愛用、m7敢講,按呢好boh,咱台灣人用珍惜e5心情,自今仔日開始,全心全力為「建國」chit兩字來拍拚,而且愛有決心,一定tioh8 hou7成!

        我tioh8真無愛信,精彩會比建國khah精彩!
 
< 前一個   下一個 >