首頁 arrow 綠色短評 arrow 馬政府講話對鼻空出來!

馬政府講話對鼻空出來! PDF 列印 E-mail
發表者 李南衡   
2010/04/16, Friday
        馬英九上台了後,台灣經濟一工一工bai3、失業率一日一日peh懸、人民e5收入一直teh kiu水;政府e5水電瓦斯汽油chhoa7頭起價,講是反應國際油價,總是價數若一下起去li3、就m7thang落來。馬英九競選支票攏已經變作「芭樂票」,幾遍立委補選及縣市長議員鄉鎮長三合一選舉,中國國民黨攏大輸。馬英九ui3中國hittheh8 tioh8一帖秘方:「兩岸經濟合作架構協議」簡稱ECFA,伊想講chit帖偏方若食落去,台灣經濟就隨時會救活起來、會koh勇起來。所以馬政府就拚勢beh ti7今年六月kap中國來簽chit-e5協議。伊完全無管全台灣e5人上煩惱e5chit-e5協議到底是「會koh hoat」抑是「會koh hoa」?

        馬政府直直強調ECFA是一帖「仙丹」,偌好對偌好。若有影hiah好台灣人那會煩惱?馬英九本人kap各級行政官員去全台灣各所在說明ECFA有啥好處,可惜人攏聽無。連台北市政府蓋有水準e5一級主管到chit陣猶m7知影ECFA是啥碗糕,beh按怎要求一般百姓聽有咧!老百姓ma7是會想,ECFA若是hiah好,政府官員那會無瞭解?若有瞭解那會講kah人聽無?若有影是好消息beh報人知,逐個半暝ma7走去聽,那會叫人來聽tioh8 koh hong5摸彩咧?

        馬政府強力推拺、一定behe5 ECFA,無法度得tioh8台灣人e5認同,上主要是因為ECFA e5內容,有e5馬政府m7敢講、be7使講、講be7出嘴,致使疑慮愈濟,特別是台灣民主進步黨提出真濟質疑。上好是來舉辦一場辯論會hou7雙方講清楚,所以才決定中國國民黨e5馬英九總統kap民進黨e5蔡英文主席,四月二五beh佇公視來辯論,hou7全台灣e5人來作裁判。

        民進黨要求總統府提供ECFA主要內容、早收清單等一寡上基本齊全e5資料。無想tioh8總統府發言人羅智強講che是民進黨刁故意扭曲,陸委有向立法院報告,民進黨佇立法院一面講資料無夠,一面一再阻擾陸委員、經濟部、海基會去立法院專案報告,民進黨講beh愛資料是講假e5,目的根本是teh進行戰術騷擾。伊講,除了牽涉tioh8談判資料無適合公開e5以外,所有e5資料攏會使提供。伊講一句話上蓋好笑e5 話,應該列入台灣「笑話史」內底。羅志強講:恁beh叫阮提供資料hou7恁,恁ma7 tioh8提供恁為什麼反對ECFA e5資料hou7阮。Koh一句ma7是聽了會hong5受氣e5話,伊講:民進黨反對簽ECFA,若是ECFA簽無成所造成e5 危機,民進黨有準備beh採取啥物款e5具體方案?

        Che那像是一個在野e5中國國民黨teh要求執政e5民進黨黨所講e5話。若無,一個執政黨那會使按呢,講話對鼻空出來!

最後更新 ( 2010/04/16, Friday )
 
< 前一個   下一個 >