首頁 arrow 綠色短評 arrow 馬總統,ECFA公投免驚啦!

馬總統,ECFA公投免驚啦! PDF 列印 E-mail
發表者 李南衡   
2010/04/30, Friday
        馬總統kape5行政院團隊攏對「兩岸經濟協議」(ECFA)自信滿滿,講tioh8那像是一帖解救台灣經濟e5大補藥。馬總統ma7四界去解說簽署ECFA對台灣e5好處。民進黨蔡英文主席講beh舉辦ECFA公投,馬總統,你驚啥?

四月二五禮拜日,雙英舉辦ECFA辯論會了後,國內主流媒體及專業機構進行e5民調結果,攏講馬總統e5表現khah好。干單《自由時報》kap逐個無仝款,tioh8 hou7恁中國國民黨文傳會主委蘇俊賓質疑。請你相信蘇俊賓主委e5質疑。請你繼續相信主流媒體既然是主流,in e5民調你tioh8 ka7信,《自由時報》e5民調kap人無仝款,mai3插伊。你原本tioh8認為應該簽署ECFA,辯論了後,主流媒體e5民調koh講你辯論了khah好。Hou7koh khah有信心。民進黨講beh舉辦ECFA公投,馬總統,你驚啥?

四月二七《中國時報》報導講,四月二五雙英辯論了後,大多數e5台灣民眾攏支持簽署ECFA。《中國時報》e5報導你當然tioh8信,大多數e5台灣民眾hou7你作靠山,民進黨講beh舉辦ECFA公投,馬總統,你驚啥?

既然chiah呢有信心,馬總統,請你大聲喝一聲:好!ECFA hou7恁去公投!相信行政院公投審議委員會tioh8 be7阻礙。連立法院hitma7省起來,免得koh hong5笑講中國國民黨靠勢立法委員人濟、大食細。Ma7免得kohhia冤家相拍、拍kah流血流滴真歹看。

馬總統希望今年六月進前簽署ECFA,四月廿七、民進黨主席蔡英文接受電視媒體專訪e5時表示,政府若beh橫柴夯入灶,假使民進黨無法度佇立法院擋掉ECFA,就會另外發起公投,用人民e5力量來否決ECFA。馬總統,ECFA公投hou7 in去辦,你穩嬴e5,你驚啥?

若是公投結果贊成簽ECFA e5khah濟,馬總統你真清楚,民進黨kap in e5支持者一定會認輸。二00八年總統大選你選嬴,民進黨kap in e5支持者恬恬無半句,鼻仔摸le3,轉去。Be7親像二000年及0四年hit兩遍總統大選按呢,恁中國國民黨候選人及恁e5支持者,選輸煞起he痀,霸佔大路、霸佔總統府頭前e5廣場起花、花be7煞。公投結果若是贊成簽署ECFA e5khah濟,民進黨kap in e5支持者tioh8雞嘴變鴨嘴、恬去!你馬總統會使大聲講:Che是台灣人同意通過e5。看你馬總統偌有面子!

若是公投反對簽署ECFA e5khah濟,你當然tioh8順趁民意、be7使簽。

        馬總統,ECFA公投你穩嬴e5,免驚啦!
最後更新 ( 2010/04/30, Friday )
 
< 前一個   下一個 >