首頁 arrow 綠色短評 arrow 中國人參觀台北忠烈祠?

中國人參觀台北忠烈祠? PDF Print E-mail
Written by 李南衡   
Friday, 07 May 2010
        台北忠烈祠大門口e5衛兵徛kah在在在,那像雕刻e5像,無論吹風曝日沃雨,攏無顫悶tioh8、完全be7振動,Hou7專工坐遊覽巴士去參觀e5遊客攏感覺誠稀奇。特別是每工ui3早時九點一直到下晡四點半,每點鐘衛兵儀隊換班儀式,koh khah是台北忠烈祠e5一個特色。

 

        每工佇台北忠烈祠外口幾十台、幾十台遊覽巴士載來參觀e5遊客,除了好奇看衛兵以外,敢知影忠烈祠是啥物款e5所在?in敢知內底服事e5ui3中華民國成立進前e5革命烈士、到中國對日抗戰所犧牲e5軍人,猶koh有國共內戰死去e5中國國民黨政府e5將士官兵,鬥鬥起來內底有三十三萬外e5英魂。老實講,內底為「國」犧牲hiah-e5戰士,大部份攏kap咱台灣chit-e5「國」無關係,是佇台灣借屍還魂e5「中華民國」in tau e5代誌。

  中國人觀光客愈來愈濟了後,難免會chhoa7 in去台北忠烈祠看鬧熱。中國人若是干單佇門口看衛兵kap衛兵交換班儀式猶好,萬不幸若拄tioh8 m7識字e5導遊chhoa7 in入去參觀koh掛解說就害了了。中國人是m7是會問講:in內底敢m7是有一大陣人是國共內戰期間hou7阮拍死去e5、才ka7 in徙入來chia hong5拜?內底hiah-e5陰魂若是會講話,敢be7問講:Hit當時ka7阮拍死hiah-e5共匪仔e5子女子孫走來chia看阮創啥?是來恥笑阮當年死了足m7值?抑是笑阮當年為tioh8 chit款無路用無骨頭e5中國國民黨政府拼命死了真冤枉?

  當然,hong5侮辱上thiam2 e5 m7是為中國國民黨政府拼死去e5 chiah-e5冤魂。hong5侮辱上厲害e5是一生kap中國共產黨拼生死hit-e5中國國民黨總裁、hou7共匪仔拍kah走路來台灣hit-e5中華民國總統蔣介石。想看mai7,一九五0年三月十三,蔣介石佇陽明山發表「復職e5使命kap目的」e5時,心肝偌呢疼、講:「咱中華民國到舊年(一九四九)就煞去ahtioh8 toe3大陸淪陷已經滅亡去ah,咱今仔日攏已經是亡國之民﹑﹑﹑。」中日戰爭結束了e5一九四五年八月二八,蔣介石有邀請毛澤東去重慶chham伊見面翕相,而且ti7 hit年十月初十簽署和平協定。今仔日有人ka7蔣介石kap伊心目中第一號e5冤仇人毛澤東,照hit張相製作做「兩e5相好」e5尪仔來賣。咱台灣人雖然誠怨嗟蔣介石佇台灣白色恐怖kap獨裁統治,m7過咱台灣人誠善良,猶無夭壽kah按呢。咱當然ma7無必要為tioh8中國國民黨出一寡了尾仔子來替蔣介石傷心,koh khah無必要煩惱ka7蔣介石kap毛澤東排做夥作「兩e5相好」e5尪仔,蔣介石看tioh8會流目屎抑be7?若會,咱ma7是贊成伊流、一直流流be7煞!

 
< Prev   Next >