首頁 arrow 綠色短評 arrow 無法律尊嚴e5國家,亡tioh8煞!

無法律尊嚴e5國家,亡tioh8煞! PDF 列印 E-mail
發表者 李南衡   
2010/05/14, Friday
        日本明治維新以後全國拚勢求強,但是猶算是弱小國家,講話m7敢大聲、做代誌ma7攏驚驚。明治二四年(1891)五月十一,當佇日本訪問e5俄羅皇太子Nicholas二世(也就是日後最後一位沙皇),佇大津市忽然間一個日本警察津田三藏chong5出來ka7刺殺,皇太子頭殼有小可tioh8傷。第二工透早,明治天皇親身拚去關西去ka7慰問。當時佇歐洲算是強國e5俄羅當然真受氣,日本驚kah phi7-phi7-chhoah。日本總理大臣、外務大臣、法務大臣,攏強烈要求法院tioh8 ka7兇手津田三藏判死刑,若無有可能會亡國。審理chit e5e5大審院(最高法院)院長兒島惟謙堅持法治國家tioh8完全遵守法律,伊對行政部門e5官員講:無法律尊嚴e5國家,亡tioh8煞!伊講,外國皇族佇日本刑法中kap一般人仝款,所以判津田無期徒刑。結果俄羅無講半句,西方國家對日本有法律尊嚴表示敬意。日後,兒島惟謙佇日本hong5尊稱作法律之神。

 

        有一個十八歲e5美國青年,佇新加坡用油漆噴抹十八台別人e5自用車,hou7法院判「鞭刑」六下、關四個月、koh罰新加坡幣三千五百箍(差不多新台幣七萬外)。真濟人知影一「鞭」落去,白phau-phau e5尻川tioh8即時皮肉開花,那會堪得六鞭?引起美國、英國、法國等西方國家抗議,甚至美國總統親身替伊求情。新加坡法院完全無插inti7一九九四年三月初三執刑。新加坡e5執法絕對be7 tang3打折,koh khah無可能搔搔掉!che就是新加坡會hong5尊敬e5所在。

  有一個中國政協福建省泉州市豐澤區台港澳僑連絡委員會召集人倪子川,五月初三來台灣招商兼旅遊。初七,佇新竹市所住飯店附近e5超商,連續兩遍偷theh8每罐新台幣九十九箍e5 BB霜,hou7店長發現tioh8 ka7扭送警方,隨時照竊盜罪嫌移送新竹地檢署。檢察官考量伊犯案情節真輕,坦承犯行、深感悔意。同時被告有kap被害店家達成和解,店家也無koh追究,所以無ka7伊不起訴,將伊釋回。借問,siang2講竊盜罪會使和解?siang2講連續偷theh8是情節真輕?舊年三月二十,一個三十一歲e5失業男子,腹肚枵餓kah be7堪得,用鐵挾仔偷hou5許願池內底e5sian2仔八十箍,買一個五十箍e5便當止枵,hong5tioh8判刑七個月,平均一箍關兩工半。兩罐九十九箍BB霜是一百九十八箍,敢比八十箍情節khah輕?新竹地方法院ui3今年四月二十到五月初六,有「竊盜」兩字e5判決有一百件,大多數比新台幣一百九十八箍情節khah輕,攏有判刑,是按怎中國人來台灣犯罪就免判刑?抑是m7ka7判刑?

  新竹地方法院法官:台灣會hou7恁舞kah變作一個無法律尊嚴e5國家neh

 
< 前一個   下一個 >