首頁 arrow 綠色短評 arrow 中華民國是一個殖民政府!

中華民國是一個殖民政府! PDF Print E-mail
Written by 李南衡   
Friday, 28 May 2010

        五月二五,台教會舉辦一場「中華民國流亡台灣六十年kap戰後台灣國際處境」新冊發表會,邀請民進黨蔡英文主席致詞,伊講:中華民國是一個流亡政府,佇過去台灣統治chit幾十年來,咱看tioh8威權統治kap中國性e5合體。TaN中國性kap台灣性、台灣主體意識發生微妙關係,以前中國性是主體,台灣性是客體,taN主客換位。蔡主席強調,ti7 chit-e5主客換位e5關鍵時刻,一定tioh8愛處理koh khah深層e5問題,像講族群關係,咱若be7 tang3認真面對外省族群佇台灣本土化經驗抑是in e5感情kap認同,下階段可能tioh8愛面對互相對抗kap社會對立。伊講:咱按怎來建構共同e5國家、共同e5新台灣,che是現階段非常沈重、ma7是非常重要e5責任。

 

        蔡英文主席e5重點是beh按怎ka7台灣建立作一個和階社會。藍營e5政府官員kap一寡名嘴,無beh認真思考chiah要緊e5問題,聽tioh8「中華民國是一個流亡政府」就phok8-phok8跳。In teh跳啥碗糕!?

  若攏知影,清國拍輸日本,訂約割台灣hou7日本。咱講he五十年是日本殖民統治時代。殖民統治政府e5特色是:一個政府統治一個所在,無得tioh8當地人民同意,用強e5用武力來管轄。一八九五年日本按呢統治台灣,一九四五年中華民國ma7是按呢統治台灣;日本殖民統治下e5台灣當然無家己e5國名,中華民國殖民統治台灣,台灣ma7是無家己e5國名;一個國家上懸e5法就是憲法,日本殖民統治台灣e5日本憲法kap統治台灣上懸e5「六三法」,m7是被統治e5台灣人制訂e5。中華民國政府殖民統治台灣上蓋懸e5「中華民國憲法」kap白色恐怖統治台灣e5「動員戡亂時期臨時條款」,ma7 m7是咱台灣人制定e5;日本殖民統治台灣佇台灣上懸e5民意機關「台灣總督府評議會」議員,攏m7是台灣人選出來e5。中華民國殖民統治台灣上懸民意機構e5「國大代表」kap「立法委員」,ma7無幾個是台灣人選出來;日本殖民統治台灣e5高級官員攏是日本人,中華民國殖民統治台灣e5高級官員ma7無幾個是台灣人;日本殖民統治台灣強迫台灣人學日本話講是「國語」(koku-go),作官方kap教育語言。中華民國政府殖民統治台灣ma7是按呢講是「國語」(kuo5-yu5)in e5「國語」仝款是台灣chite5 Holo人、客人、原住民各族e5人無人tehe5語言。

  有人講,taN台灣總統是人民選e5,官員ma7無分籍貫,中央民意代表ma7攏是人民家己選出來e5,所以中華民國m7是一個殖民政府。借問,咱e5國名咧?咱e5憲法咧?咱e5官方語言kap教育語言咧?本質猶原是一個殖民政府!

 
< Prev   Next >