首頁 arrow 綠色短評 arrow 中國國民黨政府e5台灣治安生態

中國國民黨政府e5台灣治安生態 PDF Print E-mail
Written by 李南衡   
Friday, 04 June 2010

        生物界e5生態一直有teh維持平衡。咱攏知影e5一個例是:蜈蚣-蛤仔-蛇。蛇驚蜈蚣、蜈蚣驚蛤仔、蛤仔驚蛇。佇一物剋一物、無天霸王e5狀況之下,維持tioh8生物界e5生態平衡。

        世界上有真濟國家e5社會差不多攏仝款,m7ui3 tang時開始自然形成一個治安生態平衡e5狀況。若是用大自然蜈蚣-蛤仔-蛇來作比喻,可能會使講那像是人類社會中e5烏道-警察-議員。烏道驚警察、警察驚議員、議員驚烏道,維持tioh8社會治安e5生態平衡。

  自從中國國民黨來殖民統治台灣了後,鼓勵烏道出來競選議員,完全符合西洋e5一句話:「劣幣驅逐良幣」,賢能e5m7敢出來競選擔當民意代表,m7免幾年台灣各縣市議會tioh8 hou7烏道霸佔去ahin若支持縣市長,別e5議員tioh8 m7敢認真監督抑是嚴格質詢,若有to2一個議員目睭sa無金、烏道議員抑是議長tioh8ka7叫去議長室修理。因為in護航縣市長有功勞,in要求che要求he,縣市長攏m7敢搖頭。想看mai7,連縣市長都敬烏道議員抑是議長三分,負責社會治安e5警察那敢假siau2?上出名e5例就是幾冬前e5屏東縣議長鄭太吉,伊那像身兼蜈蚣kahe5角色來凌遲那像蛤仔e5警察、kah一般平民百姓,hit當時屏東縣e5警察to2一個敢哼一聲?社會治安亂了了去ah

  今年五月二八,台中市發生一件兇殺案,當頭白日有人砰砰砰ka7人銃殺。過四工後e5六月初一,有市議員質詢,聽講胡志強市長才知影代誌大條!原來佇一名角頭開e5生技公司內底主人hong開銃拍死現場有四名警官。當時兩名警官佇裝有密碼銷房e5間內bih佇桌仔腳閃銃子,佇外口客廳e5兩名警官一名tioh8 tioh8流彈。當時台中市警察局交通隊長、市刑警大隊偵三隊長,kah交通隊小隊長、市刑大偵查是按怎會在場?聽講是因為in早前e5老同事、已經退休e5前台中市少年隊副隊長拍電話邀請in去泡茶。是按怎會去角頭開e5生技公司泡茶?已經退休e5前台中市少年隊副隊長講hong5銃殺死亡hit個生技公司e5頭家早前是烏道e5,但是chit ma2是生理人。Che若像蜈蚣kah蛤仔鬥陣,mai3講其他一般e5動物tioh8 緊閃,連身為蛇e5議員ma7 tioh8in三分。

  Ui3 chit-e5例來講,烏道in真清楚in e5身份kah角色,khah可惜是身負社會治安重大責任e5警察大人,那像be7記得in e5身份kah責任。有一工,真濟人煩惱e5代誌若變作事實:警察變作穿制服e5烏道,烏道變作無穿制服e5警察。按呢,咱一般平民百姓beh按怎tioh8好?

Last Updated ( Friday, 04 June 2010 )
 
< Prev   Next >