首頁 arrow 綠色短評 arrow 台灣司法傷過歪chhoah去ah!

台灣司法傷過歪chhoah去ah! PDF Print E-mail
Written by 李南衡   
Friday, 18 June 2010

        五月二八台中市發生翁奇楠銃擊命案,十幾工後新聞報導,殺手有可能是一名未滿十八歲e5廖姓少年。Koh講,舊年一月,chit名廖姓少年佇台中市南屯一間餐廳後埋伏,開九銃狙殺姓趙e5餐廳頭家、趙老闆tioh8五銃無死。經過兩個月掠tioh8涉嫌幕後策劃e5楊定融。楊定融早前犯有組織犯罪前科、三年前開設保全公司、舞圍事kah暴力討錢。楊定融hou7檢方依教唆殺人起訴,一審判十二年徒刑,目前交保佇外面。hit個涉嫌開銃e5廖姓少年,警方一直無掠tioh8Chit遍兇殺案,警方比對監視器、通聯紀錄、犯案手法、銃手特徵等,鎖定chit名廖姓少年涉案重大,而且懷疑楊定融教唆,beh尋伊來查證。

        尋無人,警方查出五月二八早起十點,楊定融ui3桃園國際機場出境前往香港。現此時警方m7但無te3尋人,楊定融猶koh有兇殺案發生hit當時e5「不在場證明」。警方講,原本楊某人kah廖某人ti7案發前有密集通聯,案發後會使講是同時拍m7見,研判其中那像有真無簡單e5內情。

  楊定融有牽涉tioh8 chit個翁奇楠銃擊命案抑無,咱一點仔趣味都無,he是警方e5代誌。咱khah無法度瞭解e5是,一名涉嫌教唆殺人hong5判十二年e5人,是按怎會tang3大大方方ui3桃園國際機場坐飛機出境去香港?法院那會無ka7伊作「限制出境」e5處分?

  真自然,咱會去想tioh8阿扁前總統e5查某子陳幸妤,二00九年六月二二檢方講伊涉嫌做偽證諭令陳幸妤限制出境。是m7是因為有陳幸妤想beh去美國深造讀冊e5風聲,檢方才按呢限制伊出境?咱實在m7知。總是咱會想講按呢是m7是對伊傷過嚴?若是偽證罪成立,上懸會tang3判七年,結果法官ti仝年九月初一判陳幸妤有期徒刑六個月,奇怪e5是維持陳幸妤限制出境e5處分。

  咱m7知限制出境e5條件有幾條,但是咱足清楚,涉嫌做偽證hong5判六個月徒刑e5陳幸妤,是自了m7 bat犯罪e5齒科醫,絕對是比前科累累、涉嫌教唆殺人hong5判十二年徒刑e5楊定融,對社會khah無危害,而且罪刑ma7 khah輕。是按怎對社會khah無危害、罪刑khahe5陳幸妤tioh8限制出境?罪刑比伊khah重二四倍e5楊定融顚倒m7免限制出境?

  司法teh伸張社會正義、建構和諧社會、解決社會紛爭e5同時,一定tioh8特別注意「公平性」,因為司法是用「天平」作標誌、作象徵。若是用限制陳幸妤出境kah無限制楊定融出境chit兩件代誌來作比較,台灣司法chit-e5天平會使講是歪chhoah kah無一個款!已經歪chhoah kah直直beh倒去ah neh
Last Updated ( Friday, 18 June 2010 )
 
< Prev   Next >