首頁 arrow 綠色短評 arrow 外包kah chiah無款e5馬政府!

外包kah chiah無款e5馬政府! PDF 列印 E-mail
發表者 李南衡   
2010/06/25, Friday
        六月二三新聞報導,台中市長胡志強前日kap 二00九年Nobel經濟學獎得主Williamson對談e5時,對台中治安完全無步e5胡志強市長講,伊有「警政外包」e5構想。聽tioh8 e5人攏驚一跳,台中市e5治安已經亂kah烏白分be7清,甚至有人講台中市已經淪落kah烏白共治e5地步。胡市長猶未講警政外包,都那像已經外包hou7烏道去ah,若胡市長正式宣佈台中市警政外包,烏道m7beh chheng3 kap變啥款?台中市長胡志強治安舞be7好,竟然會有「警政外包」e5構想?連警政都想beh外包Chit種人,kohbeh出來競選大台中市長?大台中市民想tioh8be7烏暗眩?

        六月十六新聞報導,咱國海軍海龍潛艦佇高雄外海實施「獵鯨」操演e5時,有一粒無裝炸藥e5訓練用魚雷ti7發射後煞消失無踨。四工後海軍才發佈新聞稿,呼籲漁民鬥相工chhoe7 hit粒魚雷,講若chhoe7 tioh8有賞金三萬箍。咱若講he是海底摸針就m7-tioh8哦,因為聽講hit粒魚雷有六公尺長、四百公斤重、射程二八公里遠,比針加大幾若萬倍。賞金那會hiah呢懸咧?因為hit粒魚雷價值新台幣一億。海軍演練會tang演練kah魚雷拍m7見,算是天才!緊去登記世界紀錄hou7台灣海軍出名一下!問題是按呢,咱敢猶有需要敵人?連beh chhoe7失踨去e5魚雷都會tang3外包,猶有to2一項國防be7 tang3外包?

  台中市長胡志強kap海軍總部那會chiah好膽想tioh8外包?主要是「大狗peh牆,小狗趁樣。」前無偌久馬英九總統才按呢做!

  馬英九競選總統期間一直到就任兩年以來,伊e5支票見開見跳,台灣人對伊e5芭樂票已經慣勢慣勢ah。六月初,馬英九總統koh開一張票面「黃金十年」e5支票,伊過去chit兩年做kah li-li落落、無一點會hong5阿佬得,猶koh兩年m7知做會透抑be7?竟然敢開hit號「黃金十年」e5芭樂票欺騙台灣人!台灣人聽tioh8「黃金十年」,第一個想tioh8 e5是詐騙集團!因為金光黨攏是用「黃金」作外表,內底囥衛生紙。當逐個真好奇chit個金光黨下一步beh按怎騙e5時,無疑誤傳出來講連「黃金十年」e5劇本馬政府無才調寫,行政院經建會用八百萬e5代價對外招標,外包hou7得標e5「中華經濟研究院」來寫計劃。

  馬政府e5施政能力早早tioh8無人敢相信ah!問題是chit-e5政府那會外包kah chiah無款咧!咱實在會煩惱,馬政府e5外交kap國防是m7是早早tioh8外包hou7中國去ah?警政已經外包hou7烏道去ah?國稅局已經外包hou7財團去ahchiah無款e5馬政府啥物m7敢外包?
 
< 前一個   下一個 >