首頁 arrow 綠色短評 arrow 馬英九啊,你騙真大!

馬英九啊,你騙真大! PDF 列印 E-mail
發表者 李南衡   
2010/07/02, Friday
        民進黨ti7六月二六下晡舉行十萬人上街頭反對簽署ECFA大遊行,兵分兩路,「反對一中市場大隊」ui3艋舺車頭前出發、由黨主席蔡英文chhoa7隊,「人民beh公投做主大隊」ui3頂好商圈出發、由前行政院長蘇貞昌chhoa7隊,兩大隊聚集佇總統府頭前e5廣場,群眾e5熱情,一點仔都無受tioh8大雨影響。

反對聲音偌大ma7無法度阻擋台灣海基會kap中國海協會,六月二九佇重慶簽署「兩岸經濟合作架構協議」(ECFA)。六月三十,中國國民黨中常會邀請經濟部長施顏祥、陸委會主委賴幸媛等首長列席報告ECFA效益,馬英九黨主席反駁綠營對ECFA e5批評。講台灣會港澳化,馬主席反駁講ECFA kap 香港e5 CEPA是完全無仝款;講會變作一中市場,馬主席反駁講是民進黨無專業。

二00三年六月二九,(中國)內地kap香港關於建立「koh khah an5 koh khah bah8經貿關係安排」(簡稱CEPA)。因為CEPA法律文本第二條e5原則說明講kah足清楚,講CEPA tioh8遵循「一國兩制」e5方針,CEPA是「一國兩制」佇經貿領域e5落實。原本中國ma7 beh kap台灣簽署CEPA,二00八年九月,中國kap台灣討論e5時,中國有考慮tioh8台灣真有可能be7 tang3接受CEPA chit-e5名稱,因為台灣無beh kap中國統一e5人愈來愈濟,中國認為無必要為tioh8名稱來發生爭議。中國kap台灣當然ma7攏知影CEPA實際上有包含tioh8「統一」kap「一國兩制」e5精神。按呢是beh按怎才好?

  二00八年九月十六,中國《中央人民廣播電台》「對台灣廣播中心」所製作e5「你好台灣網」e5評論員有透露一個訊息。伊講,中國商務部副部長姜增偉有指示一個上懸e5指導原則:兩岸tioh8拚勢建構經濟合作制度性安排,就是「簽署類似e5協議」愈緊愈好,也就是講tioh8緊簽一個「有CEPA之實,無CEPA之名」e5協議。

  頭起先台灣提出e5是「綜合性經濟合作協議」(簡稱CECA),咱m7知當時是m7是因為簡稱CECA發音那像台語e5「洗腳」無好聽,才koh去想出chite5ECFA(發音那像「會koh hoa」)。無管伊e5名按怎變,中國商務部副部長姜增偉e5話一直無變:簽一個「有CEPA之實,無CEPA之名」e5協議。ECFA簽了,香港《文滙報》訪問中國社科院台灣研究所副所長張冠華,ECFA kap CEPA有啥無仝?伊講:雖然基礎條件kap表現形式有小可無仝e5所在,但是兩個佇目標kap方向上是一致e5。啥物目標kap方向?就是統一kap一國兩制!

  獨獨馬英九講「ECFA kap CEPA是完全無仝款。」馬英九啊,你騙真大!
 
< 前一個   下一個 >