首頁 arrow 綠色短評 arrow 標準局若無標準,咱beh按怎tioh8好?

標準局若無標準,咱beh按怎tioh8好? PDF 列印 E-mail
發表者 李南衡   
2010/07/09, Friday
        若講起經濟部標準檢驗局,真濟人攏會想tioh8「正記標記」,因為「正」字外面有一個圓箍仔,所以ma7有人用一半日語一半台語講作「丸正」(Maru chiaN3),意思是講政府標準局檢驗合格e5。咱每日生活中e5度量衡,無論是稱仔、量仔、磅仔、抑是尺,因為是標準檢驗局檢驗核淮e5,所以咱會tang3放心使用、互相信賴。雖然猶無法度親像日本工業標準(JIS)抑是日本農業標準(JAShiah呢受國際認定kap信賴,但是咱chit-e5記號至少佇咱台灣國內一直有得tioh8國民e5信賴。因為che m7是一般商家「品質保證」e5廣告,che是代表政府、有公權力、有公信力e5保證。

 

        以今年來講,二月,標準局新竹分局一再呼籲民眾tioh8注意瓦斯熱水器e5使用安全,使用時tioh8保持良好通風,而且提醒民眾佇選購、安裝、定期檢修等方面,來預防無形e5殺手;像講四月,標準局命令大同、三洋、東元、聲寶、西屋、吉普生、富及第、歌林kap惠而浦等九間電器廠商收回in生產出品e5除濕機;像講七月,標準局kap消基會發佈市面上嬰幼兒學行路車檢測結果,ui3坐椅設計、孔洞、構造完整性、車輪、標示等五項試驗項目進行檢測。日常生活中,無論食穿用to2一項物件有合規格無、有合標準抑無,攏是in teh ka7咱顧守。Chit幾十年來,標準局一直hou7咱國民認定是不管時都teh照顧咱、看顧咱e5政府單位,事實上咱ma7攏真ka7感謝in

  無疑誤頂日新聞報導,經濟部標準檢驗局爆發集體賄賂了後偽造檢驗報告,hou7真濟間標tioh8政府機關採購案e5廠商,theh8 chit種不實文件來通過驗收。

Chit遍出代誌e5是標準檢驗局台北總局第六組高分子檢驗科紡織品試驗小組。In負責全國所有政府採購案e5織品及紙品檢驗。衫褲方面一定tioh8檢驗防水、透氣、防火、抗焰、抗靜電等是m7是有合格。Chit遍會hou7人真受氣e5是,有「台北縣消防局」防火衣、「核二廠」輕便防護衣、「中油」防靜電衣、「台東縣消防局」義消服裝,因為用無合格e5衫料準作合格品,無論是hou7拍火兄弟來穿、抑是核二廠、中油人員來穿,攏是會出人命e5大代誌neh!台北地檢署指揮台北縣調查站搜索、約談二十幾人到案。可能有人會講:「sim7杯無兩個博be7 tan5!」若無人送錢beh那有人thang收錢?m7-tioh8,咱聽一位業者吐苦水:「Chit兩年來送驗,每件都boeh錢!」若無tioh8 be7通過檢驗。

  咱m7但煩惱chiah-e5人連chit號夭壽錢都敢theh8!咱koh khah煩惱e5是標準局若無標準,咱beh按怎tioh8好?

 
< 前一個   下一個 >