首頁 arrow 綠色短評 arrow 台中敢有需要胡志強chit號市長?

台中敢有需要胡志強chit號市長? PDF 列印 E-mail
發表者 李南衡   
2010/07/30, Friday
        七月二五暗時九點外,出國訪問馬來西亞kap印尼轉來e5台中市長胡志強,隨時ti7半暝十一點趕去台中城隍廟ka7城隍爺作生日。伊講,伊燒香祈求城隍爺大顯神威,佇台中市警力有限e5情況之下,hou7 chit-e5已經beh滿兩個月、引起各界注目e5案件早日破案。

 

        胡志強市長所講e5 chit-e5「案件」是指發生ti7五月二八、到taN猶未破案e5台中市角頭翁奇楠命案。Chit-e5命案那會驚天動地?因為當頭白日發生兇殺案當時、有幾個警官佇現場拍牌,另外有兩個警官目睭金金看兇手那像佇無人e5所在出入兩遍,koh看兇手開銃拍死兩個人了後離開。幾台閉路監視器,那像攏無翕tioh8兇手,致使連確實e5兇手是啥人ma7be7清楚。

  Khah嚴重e5chit-e5兇殺案已經驚動tioh8馬英九總統,六月初九,馬總統以中國國民黨主席身分主持中常會,聽內政部長江宜樺、警政署副署長伊永仁專題報告了後,馬主席當場裁示「打擊犯罪、整飭警紀,一個月內提出具體成效,hou7全國民眾一個清楚e5交待。」已經過了兩個一個月ah,一點仔具體成效ma7無、當然無法度交待清楚,莫怪胡志強市長會感覺真落氣!

  Koh khah落氣e5是,台中市長胡志強已經向烏道宣戰了講beh打擊犯罪。雖然今年六月份e5暴力犯罪案件有比五月小可落落來,m7-koh猶原比舊年仝期有khah濟。胡市長講,chiah-e5數字伊有注意tioh8,伊要求警方tioh8愛作「日評比、月評比、季評比」,逐工kap家己比。可惜伊減講一個kap 舊年比。

  會hou7全國民眾haiN3e5是,無論是馬英九總統抑是胡志強市長,in兩位講e5話那親像ui3尻川發出來e5聲音、koh有臭味。     兇殺案無才調破案,台中市長胡志強tioh8去城隍廟祈求城隍爺主持公道,hou7台中市e5治安愈來愈好。胡志強市長講,伊感覺城隍爺kap伊「心靈相通」,相信城隍爺一定會保庇台中市。

  城隍爺是另外hit-e5世界e5市長,早前hong5尊敬e5 gau5人,死了hong5封作城隍爺e5有官方kap民間兩種。像講台灣新文學之父賴和先生,m7-na7是一位仁心仁術e5醫生,佇台灣文學上e5成就kap對後輩e5提拔,ma7攏真hong5尊敬,民間才會ka7 chit位死了e5人道主義者封作文化古都台南市e5城隍爺。

 

        Chit-e5世界e5市長治安舞無法伊,tioh8拜託另外hit-e5世界e5市長鬥相仝、來破兇殺案,按呢敢無真好笑?若是hit-e5世界e5市長有影hiah呢靈聖,台中市民敢猶有需要胡志強chit號市長?

最後更新 ( 2010/07/30, Friday )
 
< 前一個   下一個 >