首頁 arrow 綠色短評 arrow 台灣農民有夠卑微 ê願望!

台灣農民有夠卑微 ê願望! PDF Print E-mail
Written by 李南衡   
Friday, 06 August 2010

最近chit兩個月,佇台灣發生三件關係tioh8農村e5大代誌:苗栗大埔事件彰化相思寮事件kap貢寮田寮洋事件。中科四期預定beh徵收彰化相思寮八十二公頃e5土地,其中八十公頃是農地、兩公頃是農舍,徵地影響二十八戶農家。徵地事件因為台北高等行政法院ti7七月底kap八月初裁定,中科四期kap三期一定tioh8停工。雖然國科會講beh提出抗告,總是行政院長吳敦義已經ti7八月初四講:政府已經決定無beh徵收相思寮土地ah。相思寮農民會tàng小可安心一段時間。貢寮田寮洋雖然照行政院長吳敦義所講e5,只不過是一條河流過e5所在,事實上hia是環保團體kap賞鳥團體所寶惜e5濕地,雖然一半拋荒一半稻田,當地ê農民早就慣勢雨來淹水ê情景、歡喜住hia。行政院原本計畫behhia hou7財團起觀光飯店和住宅區,可能因為反對e5聲浪傷大抑是啥物理由,原本大細聲e5行政院長煞恬去。田寮洋那像ma7會小可拖一站仔。

 

        上可憐e5是苗栗大埔農民。經過美國有線電視台ê播送,ka7台灣e5中國國民黨政府kap苗栗縣長劉政鴻e5臭名,傳遍全世界,雖然行政院吳敦義院長kap苗栗縣劉縣長講beh好好處理大埔事件。事實上,政府e5所作所為kap手段是愈來愈行孽!m7-na7chit-e5庄頭e5包圍kap管制範圍愈來愈濶愈嚴,怪手ma7一直無停teh毀損農田,而且ka7田地e5肥土一車一車載載走,連農伯下佇田裡be7記得theh8轉來e5鋤頭ma7 be7 tang3 koh倒轉去家己e5theh8。外位仔人若beh入去大埔,警察那像teh beh掠通輯犯、問kah一枝柄。歸庄頭那像一個無牆圍仔e5監獄,chit陣上適合馬英九總統去大埔long stay」一下,體驗啥物叫作「苦民所苦」!大埔已經變作一個「連神仙來ma7無法度」住落去e5所在。Be7 tang3去巡田水看家己e5稻田、也be7 tang3去田裡挽草沃菜、也be7 tang3自由出入家己e5家園。八月初三透早,七十二歲e5大埔農民朱馮敏老太太想be7 chhun、飲除草劑自殺死去,che那是人間?

        最近發生che三件農村事件e5共同點是:台灣農民干單希望會tang3佇家己e5故鄉種作、生活,雖然收入無濟,in ma7真滿足。In向望會tang3tiau5先留落來一塊仔薄田種作,in就誠歡喜。台灣農民chit種願望敢無夠卑微?連chiah呢卑微e5願望,中國國民黨政府都 ka7剥奪,in實在是比拄tioh8土匪koh khah悲慘!人民若拄tioh8土匪猶會tang3期待政府來救in,當intioh8比土匪koh khah可惡e5政府,beh按怎tioh8好?親像朱馮敏老太太自殺死hou7恁看,政府猶in煞,田照挖、庄照圍。借問一下,咱愛chit號政府beh創啥?

Last Updated ( Friday, 06 August 2010 )
 
< Prev   Next >