首頁 arrow 綠色短評 arrow 四兩ng2-a2無除

四兩ng2-a2無除 PDF Print E-mail
Written by 李南衡   
Friday, 13 August 2010
      高雄縣長楊秋興八月初九公開宣佈beh投入大高雄市長選戰。伊一路行來,靠民進黨招牌順利當選省議員、立法委員koh兩任縣長,黨內初選選輸煞起屁面,完全be7記得伊按怎有今仔日。Che hou7我想起日本小說家星新一寫e5一篇極短篇小說〈價值測量儀〉

 

      〈價值測量儀〉是講一位老博士beh過身進前,叫伊e5助理S先生來,講你雖然無真巧,總是久長以來一直無怨言作我e5助手,我研究成功e5 chit台儀表beh送你,theh8 chit-e金屬片向啥物,細條電線黏tioh8 chite5儀表會隨時顯示hit項物件e5價值,指針愈向左旁表示愈有價值,愈向正旁表示愈無價值。S先生theh8轉去試看mai7,有影好厲害、足準!伊利用chit-e5儀表做生理,進貨e5時一試隨時知影貨品真正e5價值,伊ui3一間小間店仔開kah變一間大公司,生理愈來愈好,開超級市場連鎖店大趁錢,續落去做骨董買賣、開房地產公司、金融投資公司,因為伊所倩e5員工,ma7攏有經過伊e5「價值測量儀」鑑定過e5,逐個ma7仁仁仁。當然伊ma7靠「價值測量儀」娶tioh8一位誠賢慧e5牽手。事業大成功,佇社會上hong5尊敬e5 chit位大企業家、鑑賞家,伊上驚e5一項代誌就是M7敢測量家己有偌價值。好膽一下測,hou7伊歡喜kah大聲ai出來。In牽手驚一下,問伊發生啥代誌?伊才ui3頭講起伊成功e5秘密,伊講真歹勢,連我beh娶你進前ma7偷偷用chit台儀表測了知影你是足有價值e5人。我今仔測落去才確認家己是一個真有價值e5人。In牽手講,儀表theh8來我ka7你測看mai7。一下測落,哇!S先生是一個無啥價值e5人。伊想無那會按呢?kahchiah家己測e5完全無仝?in牽手才ka7解說,你手裡若無chit台「價值測量儀」,你只不過是一個普通人,無啥價值e5人。

 

      真濟人e5成功往往是靠一個無仝形式e5「價值測量儀」,人過頭得意e5時往往會be7記得伊是靠hit台「價值測量儀」,楊秋興縣長hit台「價值測量儀」名叫作「民主進步黨」。早前咱台灣猶未有磅仔,賣買e5時先ka7物件囥佇ng2-a2底,用秤仔秤了才扣除ng2-a2 e5重量。講人「四兩ng2-a2無除」,就是講無認清本分、m7知家己e5缺點。楊秋興縣長四兩ng2-a2敢有除?

 
< Prev   Next >