首頁 arrow 綠色短評 arrow 可憐古蹟級e5台灣大橋!

可憐古蹟級e5台灣大橋! PDF 列印 E-mail
發表者 李南衡   
2010/08/20, Friday
        八月十二新聞報導:台中縣大里市健民大橋橋thiau7 e5基礎已經看現現ah,兩年前就列作「危橋」,be7等得縣政府撥經費落來補強,落一陣小可雨橋thiau7un落去,「hong!」一聲,橋面就趨落去溪裡。好佳哉,hit陣是下晡兩點外無人ma7無車佇橋頂行。chit座健民大橋ti7九二一大地動、三十歲倒去無話講。第二年重建完成,到taN ma7才十歲就koh斷去。算是「夭壽」。

 

        橋thiau7 un落去,華語講「橋墩蹾下去」,會使講是中國國民黨政府統治台灣造橋e5一大特色。中國國民黨政府講台灣上長e5一條khong7-ku-li2(混凝土)造e5中興大橋,一九五八年十月通車,橋長一千0五十五公尺,濶十四點五公尺,懸七點五公尺。連接台北市西門町kah台北縣二重埔、koh接省道西部幹道。一九八六年,「hong!」一聲,「橋墩蹾下去」、橋面就趨落去。好佳哉,干單有兩位騎機車 e5人受傷。中興大橋khiaue5時二八歲!

  連結高雄kah屏東兩大縣上重要e5高屏大橋,二00二年八月二七,橋thiau7 hou7溪水沖un落去,橋面趨斷一百公尺,佇橋頂有十七台汽機車lian3落去,有二二個人輕重傷。到底是幾百年e5老橋?真歹勢,chit條一千九百九十公尺長e5高屏大橋是一九七八年造好通車e5。算算一下,ma7才二二歲nia7-nia7

  連接豐原市kah后里鄉之間e5后豐大橋,是台十三線三豐路頂e5橋樑,koh接國道四號e5后豐交流道,ma7算是一條重要e5橋。Chit條六百四十公尺長e5橋是一九九0年起造好e5,九八年舊橋拓寛,二00八年九月十四,因為風颱落大雨,ma7是橋thiau7沖斷去,三台車落落去溪底,有兩個人死亡、另外四個人失蹤。政府到chitma7猶未賠人。算算一下,chit條橋koh khah短命,才十八歲,十八歲猶未作兵neh!若ui3拓寛了算起才九歲,有夠夭壽!

  舊年八月莫拉克風颱帶來大雨,八月初九中晝十二點四十分,雙園大橋hou7高屏溪大水沖斷去五百公尺長。有六台車落落去、十個人不幸失踨死亡,政府到chitma7猶未賠人。Chit條大橋一九七五年完工通車,一九八0年擴建拓寛變作四線道,八一年十月完工通車。算算一下,拓宽了ma7才二八歲,若ui3起造好算起有khah長命一絲仔,三十五歲。

  咱會記得二00七年阿扁總統執政e5時,beh ka7中正紀念堂改名,當時台北市長郝龍斌講中正紀念堂是古蹟,be7 tang3烏白改名。古蹟?講一九八0年四月才落成e5中正紀念館才二七年e5建築物是古蹟!哦,按呢咱就知,台灣一寡大橋e5thiau7那會un落去、橋面那會斷去!因為攏是二、三十年e5古蹟!

註:落落去(lak-loh8-khi3)

 

最後更新 ( 2010/08/20, Friday )
 
< 前一個   下一個 >