首頁 arrow 綠色短評 arrow 台灣,咱家己e5名上蓋好!

台灣,咱家己e5名上蓋好! PDF 列印 E-mail
發表者 李南衡   
2010/08/27, Friday
        八月二五新聞報導,有台灣人出國旅遊,佇英國beh坐飛機去愛爾蘭,因為愛爾蘭有hou7咱台灣人免簽證e5優待,所以免辦簽證。Beh上機e5時一個囡仔煞be7 tang3上機,查清楚才知影逐個theh8 e5是有印英文字 “Taiwan”e5新護照,hit-e5囡仔theh8 e5是無加印英文字“Taiwan”e5舊護照,航空公司e5職員看tioh8 “Taiwan”知影無問題,卻m7 “Republic of China”是啥物國家。

 

        阿扁總統瞭解theh8中華民國護照出國旅遊e5困境,二00二年一月十三

參加佇台北舉行e5美國「台灣人公共事務協會」(FAPA)二十週年慶祝大會e5時,宣布Beh佇咱護照封面加印英文“Taiwan”字樣。隨時引起在野黨中國國民黨kah親民黨e5反對,講按呢做有「變更國號」之嫌,beh佇立法院抵制。親民黨主席宋楚瑜講,按呢做會損害國家體制、尊嚴kah國格。三、四工後,《中國時報》作民意調查,贊成佇護照封面加印英文“Taiwan”字樣e5有五十四葩、反對e5有二五葩。致使佇立法院在野黨e5阻力減少真濟,事實上按怎才tioh8在野黨內委心內ma7有數。二00三年九月初一外交部開始核發封面印有英文字“Taiwan”e5新護照。中國hit旁當然ma7 phi7-phok8跳,講按呢做是「漸進式台獨e5一種表現」、是「脫中國化」e5作法、按呢會「破壞兩岸e5關係」!

        包括美國、日本在內e5一寡國家講,新版護照封面加印英文“Taiwan”並無影響台灣人去ine5出入境。事實上加印英文“Taiwan”加真清楚、ma7加真方便。想起使用舊護照e5時實在有夠悽慘,連外交部e5官員都食tioh8鹼,二00二年有一位外交部官員佇義大利羅馬機場,因為theh8中華民國護照,移民局官員看tioh8 “China”誤會he是中國護照,台灣外交部官員hong5留置佇機場兩點鐘。有新護照以後,因為真濟人舊護照猶未到期,就照常用無加印英文“Taiwan”字樣e5舊護照,佇海外引起無必要e5困擾kah爭議,逐年都有成百件。

  

        Chit遍無加印英文“Taiwan”字樣e5舊護照佇英國出問題、be7 tang3順利去免簽證e5愛爾蘭。外交部講有ka7台灣新舊版護照款式發送hou7各國海關kah移民局,in ma7呼籲逐個緊去換封面有印“Taiwan”字樣e5新護照,會tang3避免無必要e5爭議kah麻煩。連早前宋楚瑜e5子弟兵、現此時koh變作中國國民黨e5立法委員林郁芳ma7講,舊e5台灣護照確實會hou7外國人sa無頭總。伊勸逐個緊去換有加印英文“Taiwan”字樣e5新護照。

  咱台灣有一句俗語話講:「家己e5家己好,別人e5生虱母。」國名ma7仝款,台灣,咱家己e5國名上蓋好!

最後更新 ( 2010/08/30, Monday )
 
< 前一個   下一個 >