首頁 arrow 綠色短評 arrow 鬼仔月講鬼話ê政府!

鬼仔月講鬼話ê政府! PDF 列印 E-mail
發表者 李南衡   
2010/09/10, Friday
        今年八月初十到九月初七是舊曆ê七月,照咱台灣ê風俗來講是鬼仔月。中國國民黨政府驚台灣人記得,ùi馬英九總統、行政院吳敦義院長、各部部長、一直到中國國民黨籍ê縣市長,相爭講鬼話嚇驚台灣人。那像台灣俗語話所講ê「無冬節都beh搓圓仔,無講冬節。平常時tio̍h足愛講鬼話ê中國國民黨大官,那有可能鬼仔月無拚勢講鬼話咧?我佇一大堆鬼話中間,評選出今年「金鬼話獎」ê得主是:行政院交通部。

 

        交通部ùi2000年開始,為tio̍h beh獎勵陸路單位ê拍拚,每年評選、頒發「金路獎」來表揚有傑出表現ê單位,今年(2010鬼仔月ê上尾工九月初七,頒發「金路獎」hō͘五十六個單位。其中有兩個單位hō͘台灣人看一下、驚一跳,想講是「看tio̍h鬼」。

  

        一個得獎單位是高速公路局木柵工務段,得tio̍h ê是「路況養護類」國道工務段第一名。講chit-ê工務段ê名,可能有真濟人知,你若講「國道三號七堵段」,保證有一大陣人會喝一句:「你講啥?」隨時暈倒在地,有需要請人來「收驚」!你記持若màibái,應該攏猶會記得今年四月二五下晡兩點三十三分,無風無雨無地動,國道三號落南三點一公里正旁山崙忽然間發生嚴重崩山ê意外,土石蓋掉雙向六線車道、落南ê車道有兩百公尺長、上北ê車道有五十公尺長,二十萬噸ê土石那像一粒新山崙蓋佇路頂、差不多有五樓懸。有三台車四個人不幸埋佇土石山崙下底。四個月後,交通部beh頒發「金路獎」hō͘ chit段高速公路ê工務人員當時不幸死去hit四個人若知影,目睭beh按怎會瞌?是是應該改名作「銀紙路獎」?佳哉hit個工務段ê主管猶知影見笑無去領獎。

  

        Koh一個得獎單位是台北捷運文湖線CB430區段標工程,得tio̍h「傑出工程類」第一名。Chit-ê區段標全長1.3公里、ùi中山國中站到松山機場站,得獎ê理由之一是:佇交通運輸頂面縮短旅客來往機場轉乘ê時間,提升台北市kah國際接軌ê重要功能。ÊChe kah「傑出工程」有啥關係?若是講tio̍h台北捷運文湖線,逐個上深ê印象應該是捷運系統跳電、網路siò-tò、電路板hō͘雷公hám-tio̍h

轉轍器故障、電纜線出煙等原因,致使列車停駛,迫旅客落車佇捷運高架橋頂頭表演特技行路。抑是當頭白日車廂內底會漏水?抑是管控室控kah m̄知影列車走到位,危險危險!只好控制所有ê「幽靈列車」全部停落來。Chit種一日到暗都teh出代誌ê台北捷運文湖線,無論一段得tio̍h啥物獎,都無面去領才tio̍h

        中華民國政府萬不該鬼仔月講鬼話來嚇台灣人!

 
< 前一個   下一個 >