首頁 arrow 綠色短評 arrow 值得咱尊敬ê陳思帆法官!

值得咱尊敬ê陳思帆法官! PDF 列印 E-mail
發表者 李南衡   
2010/09/24, Friday
        二00八年十一月初六,中國海協會會長陳雲林應馬政府邀請來台,台灣人發動唱陳雲林唱馬英九示威遊行,馬政府台灣ê民主自由退轉去戒嚴時期ê恐怖統治,派警察暴力執法,阻止民眾抗議。台大李明璁教授等幾位kah大學生擔心台灣人權會倒退lu,一陣人佇行政院門口靜坐抗議,主張修改違憲ê集會遊行法,而且要求馬總統tio̍htio̍h警察暴力執法過頭來會失禮、國安局長kah警政署長應該落台。Hit暗警方用違反集會遊行法作理由,聚集佇行政院門口ê教授kah學生驅散了後,hiah-ê教授kah學生重新佇中正紀念堂前ê自由廣場聚集,hit暗學生kā chitê學生運動號名作「野草莓學運」,大聲喝「集遊法違憲,人權拍見!ê口號,呼籲逐個tio̍h徛出來維護台灣拚幾十年才得tio̍h ê自由kah人權。檢警認為李明璁是違法聚眾ê「首謀」,命令解散了後猶koh繼續集會,所以beh kā伊起訴。另外,師大林佳範教授因為「主導」十一月十九各社團佇立法院門口集會,hō͘台北市中正一分局移送法辦。林教授辯解講佇立法院門口念「集會遊行法祭文」,算是「辦喪事」,那tio̍h申請啥?Kah集遊法無關係!

 

        二00九年六月,台北地檢署檢察官依「集會遊行法第29條」kā in起訴,引起全台灣各大學教授、社運工作者聚集一百人發起「阮beh自首」說明會,講hit遍集會遊行in mā有份,in堅決相信「和平集會,無罪!」民間司改會in組成五十人辯護律師團。Che是何等ê氣魄!

  

        Koh khah有氣魄ê是審理法官陳思帆。照預定今年(2010)九月初九台北地方法院宣判,陳思帆法官講:現此時ê集會遊行法有歧視特定言論ê疑慮,m̄-nāhông煩惱有違反憲法比例原則kah侵害人民集會自由,有可能違反tio̍h保障人權hit「兩個公約」,就是舊年實施「公民kah政治權利國際公約」kah「經濟社會文化國際公約」施行法,該法明明定講,見若無符合兩個公約「保障人權」、「人民自決」等精神ê法律,應該兩年內修正,集會遊行法限制人民集會遊行自由,恐驚會有歧視特定ê言論,恐驚已經牴觸tio̍h 兩個公約ê精神ah!所以伊當庭裁定暫停審理,全案聲請大法官解釋。

        chit陣為止,有真濟kah集會遊行法有關ê案件,一般ê法官明知用集會遊行法beh判人有罪實在是真勉強,講過、落,最後攏是造一寡有影無跡ê理由判無罪。出目睭頭一擺看tio̍h chit號法官,ùi惡法ê根挖掉。莫怪李明璁教授會講,伊kah學生ê和平行動,遭受惡法集會遊行法起訴,陳思帆法官宣布停審,惡法the̍h去請大法官釋憲,比判我無罪,我聽了koh khah爽!

 
< 前一個   下一個 >