首頁 arrow 綠色短評 arrow 中國國民黨ùi根爛起!

中國國民黨ùi根爛起! PDF 列印 E-mail
發表者 李南衡   
2010/10/01, Friday
        九月二五,中國國民黨中常會改選中央常務委員(簡稱中常委),除了有五位政務指定中常委kah兩位青年中常委以外,由一千六百位黨代表,ùi三十八位登記參選人中間選出三十二位,現任立法委員the̍h tio̍h十三席,立委當選比率有九成懸,現任中常委ê立委吳育昇卻落選,hō͘真濟人驚一跳,紛紛議論講:三十八個選三十二個,想beh落選都真困難,特別是對吳育昇chit號大腳賬(kioh-siàu)來講,親像桌頂ni柑,那有可能失誤去咧?

 

        Ùi另外一個面來看,舊年中國國民黨中常委選舉,照永年仔ê慣例,有人藉中秋節ê名送禮、餐宴、á是換票等步數涉嫌賄選,聽講頂頭ê人無歡喜,先刣楊吉雄kah陳達隆來教猴,可惜猴陣攏無驚,中央無起歹煞使,才koh大聲講為tio̍h端正選風,展示中國國民黨革新ê魄力,補刣李全教、許顯榮、姚江臨、蕭景田、沈慶京、陳杰、華真、賴調燦、李嘉峰、陳文漢、黃志雄、江碩平等十二個中常委參選人,處分in停權三個月,失去hông選作中常委ê資格。隨時引起koh khahê雜音,講買票賄選是中國國民黨歷史ê共業,那會使按呢處罰?刣chit十四人,借問馬主席,beh按怎證明當選hit三十幾人是清白ê

   

        因為舊年ê經驗,今年beh選三十二個中常委干單三十八個人參選niā-niākah舊年chhiāng-chhiāngê七十五人參選完全比並得。Koh因為今年黨主席馬英九祭出嚴厲規範,設檢舉獎金,私設「小秘探」,那像teh掠賊仔ê監控之下,巧巧人那有可能像永過hiah呢「公開」「大範(toā-pān)」買票?馬主席足得意講今年中常委選舉是上蓋清氣ê一遍。

  

        舊年hông停權hit十四個人,那是普通人?佇各行各業á是佇地方攏是有頭有面ê人,今年手路當然加真幼、力頭加真飽。選舉結果李全教衝第一懸票,姚江臨第三懸、許顯榮第七名、蕭景田第十六名、陳文漢第二二名。按呢猶無夠氣,in順續報一個老鼠仔冤,舊年大細聲喝講tio̍h辦涉嫌賄選hit-â吳育昇,逐個攏知影伊是馬英九主席ê人,當時驚掃tio̍h風颱尾、無人敢出聲,君子報仇三年慢。今年當然tio̍h hō͘伊知影一個鹼chiáⁿ滋味。有人講吳育昇是意外落選,有人講伊ê落選可能kahchhoā媠姑娘仔去「休憩(khiû-kéi)」有關係,看tio̍h新聞報導ê時,真濟人攏問講:伊敢是歸嘴仁義道德hit-ê吳育昇?事實上,若想起舊年吳育昇刺giâ-giâ ê氣勢,今年中常委落選,是意料中ê代誌,無落選才是奇怪。

        買票賄選是中國國民黨立黨ê基礎,beh按怎改革攏是喝爽喝假ê。講中國國民黨ùi根爛起ah,驚你信,借chit遍中常委選舉,爛hō͘你看。

 
< 前一個   下一個 >