首頁 arrow 綠色短評 arrow 釣魚台到底是啥人ê?

釣魚台到底是啥人ê? PDF 列印 E-mail
發表者 李南衡   
2010/10/08, Friday
        差不多八百外年前,宋國尾期興起ê金國章宗皇帝佇北京城起一個釣魚ê台,hit-ê所在自按呢號名叫作「釣魚台」,留名到今。清國時代有佇hia起行宮。1959年中華人民共和國佇hia起一個會晤國賓、hō͘國賓歇睏、kah國賓開會上高級ê國賓館園區,南北長一公里、東西濶五百公尺,總面積42萬平方米,總建築面積165千平方米、湖面面積五萬平方米。十七棟接待樓全部是兩層起ê青磚紅瓦樓房,編號到十八號樓,因為接待國賓無編十三號樓。Che kah最近中國、日本相爭hit-ê釣魚台一點仔關係都無。有人罵講中國敢用武力 the̍h釣魚台,干單出一支嘴kah起釣魚台賓館罔過癮niā-niākah事實無合。

 

        九月初七,一隻日本漁船佇釣魚台海域kah兩台日本巡邏船相撞,中國船長hō͘日本仔掠去拘留十工,害中國kah日本關係大緊張,中國外交部召見日本駐中國大使四遍,續落去日本koh判決延長拘留船長十工,佇美國紐約參加聯合國大會ê中國總理溫家寶氣phut-phut講,日本隨時無條件放人,若無,因為按呢所產生ê一切後果,日方tio̍h承擔全部ê責任。日本驚一下緊放人。

  Chit-ê華文寫作「釣魚島」、日本人講是「尖閣諸島」ê幾個島嶼,其實是無人住ê所在。日本講「尖閣諸島」是屬日本ê、美軍ùi第二次世界大戰後佔領沖繩、19474月聯合國正式交hō͘美國託管,1972年美國沖繩交還日本,但是繼續駐軍佇hia。日本宣稱美軍同時mā kā釣魚島交還日本。惹台灣、中國ê抗議,七十年代引起一波「保衛釣魚台運動」。

  中國聲聲句句講釣魚台是中國êin上偉大ê理論基礎是按呢:釣魚台是台灣ê,台灣是中國神聖不可分割領土ê一部份,所以釣魚台是中國ê。咱台灣若講:台灣是台灣,一旁一國,台灣kah中國無關係。按呢,中國tio̍h只有大嘴開開,伊講釣魚台是中國ê就會變作一句講ê話、抑是一個笑話。

  日本殖民統治台灣期間,釣魚台屬台灣宜蘭頭城管轄,日本、中國攏敢、mā bē-tàng否認chit-ê歷史事實。十月初五,民進黨立委陳明文佇立法院質詢問講:日本kah中華人民共和國攏講釣魚島是in ê,咱政府ê立場是按怎?頂日仔中國漁船侵入hit-ê海域、也就是侵入咱國ê領海掠魚,是按怎咱無beh kā趕?顚倒是日本巡邏船teh kā趕?行政院長吳敦義答詢講:「中國任何解釋,你會使解釋講in贊成釣魚台屬中華民國領土。」

        中國大細聲喝講釣魚台是中國ê,你beh按怎解釋講是中國贊成釣魚台屬中華民國ê領土?知陳明文立委聽了有吐血抑無?

最後更新 ( 2010/10/08, Friday )
 
< 前一個   下一個 >