美國總統川普beh起造長牆圍敢是悾的?
Written by 李南衡   
Tuesday, 14 March 2017
舊年美國總統競選期間,共和黨候選人川普(Donald Trump)有發表政見講,伊若當選,beh佇美國kah墨西哥的邊界起造牆圍,要求墨西哥tio̍h費用。川普當選了,今年一月二六,履行競選諾言的第一步,正式簽署兩項行政命令。beh佇美國kah墨西哥邊界開始起造牆圍,是伊佇視察國土安全部的時批准開始「佇南部邊界建立大型實體障礙」的命令。全世界的人才知影川普是講真的。墨西哥總統Pena Nieto講伊有川普總統講,墨西哥一角錢都出。川普唱聲放調講:設使墨西哥若chit條錢,上好是取消接續落去beh開的會談。 問題是,川普講beh起造的chit堵三千兩百公里牆圍,敢真正會tàng有效防止非法移民進入美國?佇chit三千兩百公里長的邊界,差不多是台北至高雄三百六十公里長的八點八倍,其中有各種天然屏障-像講懸山kah大河格蘭河(Rio Grande),干單chit條大河tio̍h無可能克服,因為chit條大河是美國kah墨西哥的天然邊界,法律禁止興建任何會妨礙水災管理抑是資源交換的建築,另外一項協定mā禁止任何一國kā河川改道。Koh來是大部分的邊界是佇荒郊野外,完全無路thang去到hia,若beh運送器材、鐵條鋼枋、預鑄混泥土(cōng-ku-lí)枋,tio̍h先徵收真濟私人土地來造路、估價干單造路的費用tio̍h開二十億美金,起造牆圍所需要大量的紅毛土kah cōng-ku-lí,致蔭tio̍h倚近邊界的墨西哥建設公司Cemex(se-me-ku-sū)kah美國的兩間建材公司,致使最近chit三間公司的股票攏大起。川普總統下令beh起造chit堵牆圍tio̍h使用美國的鋼材,但是若照美國佇世貿組織(WTO)的承諾,防止外國生產的貨品佇通關的時遭遇不公平對待,真濟人teh偷笑,歸尾會用價數khah俗的中國鋼鐵kah其他材料,煞變作中國佇北美洲新起造的萬里長城。人咧,起造chit堵長三千兩百公里長、懸十二米的牆圍需要諾濟工人?無倩墨西哥工人beh倩siáng?美國beh to chhōe chit號俗koh肯食苦的工人,純然是hō͘墨西人創造工作機會。 Chit堵三千兩百公里長的邊界牆圍,有人粗步估價工程費需要140億美金, 差不多是四千億新台幣。Tang時會完工?比伊khah早tio̍h有一個kah伊差不多平悾的富施總統(George Buch)任內,2006年美國國會有通過一個「安全牆法案」,批准政府起造一堵700英里(約1,126,5公里),以防止非法移民,偷渡毒品等問題。到十年後的今仔日才起造625英里(約1,005公里)。算算一下,川普總統下令起造的牆圍,相信到伊落任的時猶未起好。   川普beh起造長牆圍若是悾的,悾的美國總統伊m̄是第一個。