川普敢有影拍狗無看主人?
Written by 李南衡   
Wednesday, 19 April 2017
你的頂司抑是長輩chhoā一隻伊上疼惜的狗做夥來恁兜,hit隻狗真無款,連鞭pehpeh低,連鞭坐起lí phòng椅頂,ê頂司抑是長輩,tèⁿ恬恬那像攏無看見。Chit-ê時陣,你干單會tàng苦笑niā-niā。若是hit隻狗koh khah亂來,烏白咬你厝裡的物件,你敢會罵?甚至趕?應該是無可能,因為台灣有一句俗語講:「拍狗mā tio̍h看主人。」但是hit隻狗的主人若是頂司長輩咧? 四月初六,美國川普總統下令發射飛彈,轟炸敍利亞的沙拉特空軍基地,發射五十九粒「戰斧」巡航飛彈摧毀基地上六隻維修中的軍機、kah包括燃料庫在內的幾棟建築物。但是足奇怪的是,砲道、滑行道kah停機坪頂面的敍利亞軍機攏無損害tio̍h。會tàng看出來美國chit遍的轟炸行動,警告意義khah大過毀滅意義。警告啥物?   針對四月初二,敍利亞軍隊用毀滅性的化學武器襲擊平民,惹起敍利亞內戰六年以來,美國頭一遍直接向阿薩德政權採取軍事行動。美國並無kah敍利亞交戰,mā無真正beh拍敍利亞hō͘死,伊飛彈干單轟炸載化學武器飛機起的沙拉特空軍機場一個所在。美國只不過是警告阿薩德總統bē使koh向家己的人民使用毀滅性的化學武器,若是警告bē聽、美國真正出手絕對m̄是按呢niā-niā。同時mā是做hō͘北朝鮮看,美國新上台的川普總統m̄是會假siáu得ê。 美國當然知影敍利亞阿薩德總統後壁的靠山是俄羅,俄羅佇敍利亞有空軍基地kah海軍設施,但是對chit遍的轟炸,俄羅mā無可奈何講:「華盛頓的行為會嚴重損害俄羅kah美國的關係。」俄羅干單會tàng目睭金金看伊的狗hông拍。極加是緊派一隻有巡弋飛彈的護衛艦去地中海。   Chit點來講,中國to̍h加真巧。中國看美國用飛彈轟炸敍利亞的機場,看美國公開警告北朝鮮的同時,美國kā卡.敏孫號(USS Carl Vinson)等三隻航空母艦一直向朝鮮半島駛過來。無管北朝鮮的第一大報《勞動新聞》講,朝鮮mā有可能對美國發動先拍先嬴的打擊,警告美國川普政府tio̍h放棄任何先拍先嬴的打擊計劃。那像戰爭隨時會爆發。美國向中國施壓,要求中國採取koh khah濟的行動,去遏制ùi北朝鮮來的威脅。Tâⁿ去美國訪問、kah川普總統會談了的中國國家主席習近平,當然足清楚川普m̄是講sńg-ê,四月十二早起,習近平主席kah川普總統通熱線電話,強調中國堅持實現朝鮮半島無核化的目標,主張通過和平方式解決問題,願意kah美國就半島問題保持溝通協調。Che明明是習近平主席kā川普總統拜託講:Mài管hit隻戇狗按怎吠,拜託一下,拍狗mā tio̍h看主人!