無教育,才會做出愚戇的代誌!
Written by 李南衡   
Friday, 21 April 2017
台灣嘉南平原hiah大片平坦坦的所在,因為熱天厚雨、冬天乾燥,而且土質鹽份傷懸,干單會tang種作土豆、番薯,每年熱天koh有幾遍風颱帶來大水,hiah大片土地每年粟仔的收成無宜蘭蘭陽平原的一半。 1910年(大正九年)ùi東京帝國大學畢業的八田與一來台灣工作,1919年成立「公共埤圳官佃溪埤組合」,八田與一技師chhōa八十外名技師負責所有實地測量、設計kah工程相關事宜,1920年嘉南大圳的設計kah規劃完成,八田與一負責建造嘉南大圳的核心工程-烏山頭水庫,伊利用台南官田、六甲、大內、東山之間地勢khah低的山谷作儲水區,貯蓄官佃溪雨水形成珊瑚形的水庫。另外佇曾文溪上游大埔溪北岸建造一個取水閘門,挖一個取水磅孔貫穿烏山嶺,引大埔溪水到官佃溪上游進入水庫。嘉南大圳下游以烏山頭水庫作中心,分作南北兩幹線,灌溉的範圍包括今仔日的台南市、嘉義縣市、雲林縣。1920年九月,當時亞洲上大的灌溉土水工程正式動工。八田與一m̄-nā研究世界土木專家的論文kah先進國家興建大壩方法,koh去美國、加拿大、墨西哥各國作實地調查。邀請美國土石水壩專家來現地調查指導,伊發明一種「半水力沖淤式土壩施工法」興建大壩,干單用0.5% 的khōng-ku-lí,以外是大細粒石仔、黏土kah溪沙。Ùi美國、德國進大型的土木機械,使用大型的挖土機,起造臨時鐵枝路thang hiō͘ 56噸的火車母kah運送沙石的車輛來走。預定十五年完成的工桯七年完成。   1930年四月初十,規模、技術亞洲第一的chit-ê水利設施-嘉南大圳,順利通水使用,灌溉水道總長一萬公里,排水道六千公里,主護岸kah石poh有二百二十八公里,灌溉嘉南平原十五萬公頃的農田,有六十萬農民受益,每年收成水稻、甘蔗kah雜糧有八萬三千噸。伊kā十五萬公頃農地分作三大區,每一大區分作150公頃的小區,每小區koh分作三個50公頃區塊,每小區內有設水門控制供水,三年輪作水稻、甘蔗kah雜糧,三年一遍kā水稻田鹽分釋薄。而後近水路的所在水稻一年收成三遍,離水路khah遠的地區的水稻一年至少收成一遍,Hō嘉南平原變成台灣的粟倉。台灣人感念八田與一chit位「嘉南大圳之父」。   今年(2017)四月十六,一個中華統一促進黨成員、前台北市議員李承龍去烏山頭水庫,kā八田與一紀念銅像的頭鋸掉。因為幾十年來佇中國國民黨統治下的台灣,根本無beh hō͘生活佇chit塊土地的人認識台灣的歷史,瞭解台灣的地理。致使有人看tio̍h日本人留落來的紀念銅像,tio̍h無理性夯電鋸去kā伊所m̄-bat的八田與一的紀念銅像的頭鋸掉。無教育,才會做出愚戇的代誌。