管伊中國國民黨主席siáng當選!
Written by 李南衡   
Friday, 19 May 2017
五月二十,中國國民黨改選黨主席,半冬前tio̍h有人開始ngiāu-ngiāu動。照一個候選人郝龍斌講:「綁柱仔腳」、「請客食飯」「攻擊家己人」是中國國民黨的惡劣選舉文化,一定tio̍h改變,才會tàngtio̍h民心。另一位黨主席席候選人吳敦義強調「家己背叛(中國)國民黨,mā m̄-bat去民進黨政府做官。」Che明明是teh「攻擊家己人」;郝龍斌針對有另外一位候選人暗暗批伊對黨不忠,伊講,當年我是「穿草鞋出去拍拚的」,是留佇李登輝主政的(中國)國民黨內「榮華富貴」。知伊是teh罵吳敦義、抑是tehin阿爸郝柏村佇李登輝主政下做行政院長,抑是兩個攏罵,「攻擊家己人」? 另外一位候選人詹啟賢講,chit遍黨主席選舉,有人頭黨員、烏道入黨、請客食飯、政治利益交換,賄選綁柱仔腳的情形真嚴重。佇某一縣市有hō͘黨代表六萬、hō͘青工十萬、hō͘議員二十萬。伊感慨講,(中國)國民黨敢會使墮落kah chit款?另外一位候選人吳敦義講,chit遍選舉有黨主席、中常委、中央委員kah黨代表,若是kā「聽講的」放送到全台灣,koh無beh明講啥人賄選綁柱仔腳,「tio̍h是kā(中國)國民黨的歸個形象舞歹了了。」何況「有人做賊的teh喝掠賊!」   Khah有笑的是,中國國民黨主席候選人登記,每一個候選人tio̍h繳有效連連署書超過一萬三千三百二十二份。六個候選人攏真拍拚去chhōe黨員連署。到四月十八作業截止日有黨權的合格黨員人數約有四十七萬八千。無疑誤六個候選人交出來的連署書,合起來會tàng pòng到七十二萬一千五百八十一份,加出來二十四萬三千五百八十一人,差不多加50.96%。結果黨中央講無beh去查。干單繳出五萬七千外份的韓國瑜要求黨中央對chit-ê「怪現象」tio̍h hō͘外面一個交代說明,那像「狗吠火車」。認真舞到尾仔若其他五個攏做假,五個攏tio̍h退出,韓國瑜宣布一人競選當選!若無,chit遍黨主席選舉敢m̄是變作選假的?   蔡英文政府執政一年,民調顯示台灣人對民進黨、蔡英文的好感度kah支持率攏像「西北雨」直直落。應該是hō͘一個盡職認真的最大的在野黨一個真好的機會。M̄知啥意思,台灣人對中國國民黨的好感度kah支持率mā攏 tòe人直直落。競選黨主席應該是發表個人的想法kah有可能的做法,beh按怎kā一個beh死beh死的中國國民黨救活起來,按怎hō͘台灣人對中國國民黨有信心,願意支持伊。無,無人提出政見,逐個相爭罵蔡英文罵民進黨。事實上,kā蔡英文、民進黨罵kah倒té土腳,並bē增加台灣人對中國國民黨的一絲絲仔好感。   管伊中國國民黨主席siáng當選!攏仝款,無救。