回應習近平的「六個任何」!
Written by 李南衡   
Tuesday, 08 August 2017
七月三十先佇內蒙古朱日和訓練基地閱兵,八月初一佇北京人民大會堂舉行的人民解放軍九十周年紀念大會,中國國家主席、中國共產黨中央總書記、中共中央軍委主席習近平發表談話,重申「黨指揮銃,不容允銃指揮黨」,強調黨對軍隊的絕對領導,任何時陣任何情況之下攏tio̍h以黨的旗作旗、以黨的方向作方向、以黨的意志作意志。 習近平最後強調,中國珍惜和平,絕對無beh舞侵略擴張,有信心戰嬴一切的侵略。「阮絕對無容允任何人、任何組織、tī任何時陣、用任何方式,kā任何一塊中國領土ùi中國分裂出去,啥人都免指望阮會kā損害阮國主權、安全、發展利益的苦果吞落去。」解放軍會堅決維護中國共產黨領導kah中國社會主義制度,堅決維護國家主權、安全、發展利益,堅決維護地區kah世界和平。 咱應該kā看作中國in兜的代誌,習近平是講hō͘ in軍隊聽chiah-ê有激勵意義的話,無必要親像民進黨發言人王閔生講:「任何恫嚇的語言干單會遠遠離開台灣的民心,對兩岸大局的和平穩定不利。」因為台灣的民心kah中國無tī-tāi。 咱攏知影,一台車若是老王的,老王bē一日到暗kā人講hit台車是伊的,那像中國政府無可能一日到暗kā人講上海是伊的,因為伊家己知、全世界的人mā攏知。但是,老王看老林一個水壼真合意、真數想,伊才會一日到暗kâng講老林hit-ê水壼是伊的。因為老王是有錢koh有勢的烏道老大,無人愛佇面前講伊m̄-ti̍ioh,但是絕對m̄是按呢老林的水壼to̍h是老王的。 針對中國國家主席習近平所講的「六個任何」,陸委會坦言講:「中國無放棄對台動武,近來koh khah 捷軍事演訓,升懸台灣kah周邊區域緊張情勢,引起國際社會疑慮,是兩岸關係無法度正向發展上大的障礙。」咱兩千三百萬台灣人應該真清楚,台灣自了to̍h m̄是中華人民共和國的一部分,咱有咱的土地、人民、主權、政府。咱過咱民主自由有人權的生活,kah專制獨裁無自由的中國一點仔關係都無,咱的軍隊kah大多數的國家仝款,是國家的、效忠國家,m̄是效忠叼一黨,因為民主國家執政黨是人民定期用選票決定的、時到有可能會替換。咱tio̍h有堅定的決志kah信心顧守台灣。咱兩千三百萬台灣人會使kā習近平主席的話小改一下,回應習近平主席的話,大聲講: 「阮絕對無容允任何人、任何組織、tī任何時陣、用任何方式,講台灣是in的,台灣是兩千三百萬台灣人的。啥人都免指望阮會kā損害阮台灣主權、安全、發展利益的苦果吞落去。」