向新竹縣兩位勇士致敬!
Written by 李南衡   
Friday, 11 August 2017

五月初四,新竹縣中國國民黨籍議員楊敬賜,針對新竹縣房屋稅徵收率自治條例提出修正草案,kā m̄是家已住的其他房屋稅率,ùi 2.5%修正作1.6%,當議會通過的時,原本舊年提案徵收2.5%的兩位議員,全台灣唯一縣市議員的勞動黨高偉凱kah全台灣干單兩位縣市議員的綠黨周江杰,當場宣布辭職,表示ùi修正案公告實施日起生效,來表示對選民kah家己所提的法案負責。In講,法令的修改,一定tio̍h有人出來負責,照責任政治的慣例,in兩個是原法案的提案人,當然tio̍h kah法案仝進退,所以tio̍h辭掉議員的職務。引起各界關心kah注意。

In講,舊的法案當初是in兩人提的,tio̍h是希望kā「家已住的厝」kah「m̄是家己住的厝」稅率差距giú khah大。舊年底,阮會阮會提出、而且議會通過「m̄是家己住的」稅率,其實是針對包括新竹縣竹北市「囤厝」的居住環境,才會提議針對「m̄是家己住的厝」的差別稅率,阮深深相信從事政治tio̍h是beh拚公平正義原則會tàng實現。可惜修正了的法案,縣政府會減7,407萬的稅收,但是並m̄是hō͘ 92%的縣民減稅金,干單hō͘ 8%有「m̄是家己住的厝」的人減稅金,其中有百外間建商會減tio̍h上濟稅金,阮認為新的法案非常無公平,希望藉tio̍h阮兩人的辭退議員chit-ê動作,引起khah濟人重視chit-ê問題。   政治大學地政系教授張金鶚(go̍k)謳咾in兩位,而且指出地方政府對少數囤厝投資者的壓力抵擋bē-tiâu,用khah低的單一囤厝稅率來因應,koh khah明顯hō͘咱看出地方政府無願意面對少數投資炒房囤厝的不當行為,koh khah忽視財政的困境。房產名嘴Sway講kah真歹聽,伊罵講:「新竹縣縣議員食相傷歹看!」   原本台北市長柯文哲想beh kā「m̄是家己住的厝」課稅ùi 3.6%降作2.%,驚hông罵講是「圖利建商」。無疑誤七月十五,m̄驚人罵的台北市議會,三讀通過「房屋稅徵收自治條例」修正草案,kā建商未賣出房屋,一年內改作三年內。原本2014年十月市議會三讀通過,凡若「m̄是家己住的厝」兩戶以內,每戶課徵稅率ùi原本1.2%提高到2.4%,有三戶以上的每戶課徵3.6%。 今年七月十五改作未賣出「m̄是家己住的厝」,一律課徵房屋稅1.5%。按呢會減收三億外稅金。咱m̄知有幾%的台北市民得tio̍h好處?咱mā m̄知台北市議員是m̄是親像房產名嘴Sway所罵的:「新竹縣縣議員食相(siàng)傷歹看!」   上遺憾的是,咱無看tio̍h一兩位台北市議員表示憤慨、甚至提出辭職,mā無聽tio̍h任何一位台北市議員徛起來hng一聲。足奇怪!   台北市若有綠黨kah勞動黨市議員,m̄知諾呢好!