柯文哲講:有人beh修理柯文哲,無辦法!
Written by 李南衡   
Friday, 06 October 2017
九月二九,台北市長柯文哲接受趙少康主持的電台節目「少康戰情室」訪問,講起九月二四佇台大田徑場舉辦的「中國新歌聲」活動,烏道拍學生的流血事件,柯市長講有人beh修理柯文哲,無辦法。啥人hiah好膽敢beh修理柯文哲? 事件發生的第二早起,柯市長講協辦的台北市政府完全無疏失。十月初二,柯市長去市議會專案報告「924台大事件」,李慶鋒議員講伊對柯文哲ùi受氣變作失望,柯的問題m̄是啥物色的問題,是誠信的問題。佇議場伊問市政府官員真正認為市政府完全無缺失的請夯手,無人夯手。M̄知啥人beh修理柯文哲?   台北市政府到舊年底,已經有3,249人離職,股長以上的缺有98個,有人問柯市長那會按呢?柯文哲市長講「因為無thang thio」,意思是無thang歪哥。按呢是m̄是暗示猶未走的「有thang thio」?M̄知啥人beh修理炣文哲。   仝款佇「少康戰情室」節目中,伊講阿扁前總統頭起先是「假影破病」,關一下久煞真正破病。第二工「阿扁民間醫療小組」隨時反駁聲明柯文哲已經無適合擔任阿扁醫療小組召集人身分。阿扁醫療小組發言人陳昭姿貼出2012年五月陳水扁醫療報告,柯文哲kah郭正典進入北監會診了後,佇報告書寫講:「阿扁總統病了無輕,已經出現焦慮症的舉止」。M̄知啥人beh修理河文哲?   七月初,柯文哲市長去上海參加「台北上海雙城論壇」轉來,感覺真奇怪,兩年前伊to̍h有講「兩岸一家親」無啥反應,今年那會hiah濟人hiah受氣。兩年前少人知chit句話是柯市長khioh中國國家主席習近平2013喝出來的話,今年才知影原來柯是一個phô͘先,莫怪中國官員笑面歡迎。今年koh加「兩岸是命運共同體」kah「兩岸床頭拍床尾和」,台灣人才大受氣。柯市長佇電視訪問中緊kā責任捒hō͘蔡總統,講伊的演講稿事先有送hō͘國安會。總統府隨時出來講,縣市長佇外國的演講稿免送總統府。柯市長講伊的辦公室主任蔡碧如送去國安會、送兩擺。總統府緊聲明總統府自了m̄-bat看tio̍h啥物演講稿。柯市長koh改講是國安會的人來市長辦公室the̍h去的。逐個看kah hàiⁿ頭,m̄知啥人beh修理柯文哲?   明年台北市長選舉,民進黨到底是家己提名抑是讓柯文哲,猶tehe躊躇。柯文哲市長唱聲:「民進黨有才調家己選,tio̍h家己去選ah!」氣死一寡民進黨的支持者。M̄知啥人beh修理河文哲?   原來修理柯文哲市長的是柯文哲的嘴舌。但是柯文哲的嘴舌,柯文哲市長完全管伊無法。所以咱想,柯文哲的嘴舌應該m̄是柯文哲市長的。   一枝m̄知啥人的嘴舌,一直teh修理柯文哲市長。有影無辦法。