佇台灣會使夯啥物旗?
Written by 李南衡   
Friday, 03 November 2017

 台灣是一個民主自由平等的國家,啥物人夯啥物旗攏會使得。

 但是,咱bat看過khah奇怪的代誌。第一遍是中國國民黨馬英九總統執政時代的2008年十一月初,中國海協會會長陳雲林來台灣訪問,十一月初二,有民眾夯有國旗圖案的雨傘去圓山飯店門口,hō͘警察強制驅離。臺北市警察局中山分局長謝文傑面對記者問講:若有民眾夯國旗歡迎陳雲林會使boh?謝分局長應講:「會依法處理」,記者問講:分局長你對佇中華民國的領土頂面夯國旗chit件代誌,那會m̄敢正面講會使?謝分局長應講:依中華民國法律處理。記者koh追問講:中華民國法律有禁止民眾夯國旗嗎?謝分局長應講:依現場情況處理。十一月初三,民眾佇連接桃園機場的高速公路路橋頂頭夯國旗抗議陳雲林,hō͘警察暴力趕走,國旗hō͘察警當場拆歹。有女警阻止民眾夯國旗的理由是:「因為chia是公共場所。」但是有一大陣「中華統一促進黨」成員,夯中國五星旗佇路邊歡迎陳雲林的車隊經過。仝一工,陳雲林拜會辜嚴倬雲的時,有三名網友前往台泥大檈門口表達訴求,hō͘警察粗暴對待,kā in手裡的國旗搶去。有人抗議警察公然損毀國旗已經公然觸法,民誰黨主席蔡英文痛批警方干預民眾人身安全kah言論自由,台灣為chit-ê付出慘痛的代價,馬英九總統應該負責。   第二場是過九冬後的民進黨蔡英文總統執政的2017年,八月三十台北世大運閉幕式的時,有穿烏衫的人佇入場的所在強制沒收民眾所夯的綠色旗仔,甚至有民眾因為夯旗仔起爭執hông掠去警察局。事後台北市長柯文哲講種種壓制獨派人士的作為kah伊無關係。咱攏有佇電視報導看tio̍h穿烏衫的人按怎搶人綠色的旗仔,柯市長講:「旗仔攏是逐個家己hē入去桶仔底的。」柯市長chiah呢粗魯配合中國要求:「世大運場內mài看tio̍h綠色的旗仔」實在足無品!頂日柯市長講,伊若看暗時談話性的政論節目,家己若像是「共產黨」。柯市長看家己傷有起,伊那是「共產黨」?伊極加是「共產黨」的「細漢的」而已。   佇台灣有人看見中國的五星旗颺颺飛看kah真bē爽,有網友提案禁止公開掛中國五星旗,國發會講恐驚有超出行政院業務範圍無法度回應。台灣是一個民主自由平等的國家,啥人夯啥物旗攏mā會使。咱去任何國家夯啥物旗in攏無kā咱禁止,咱mā無理由禁止外國人佇台灣夯啥物旗。咱若佇中國bē使夯chit號旗、bē使夯hit號旗,真簡單,佇平等對待的原則下,咱當然應該禁止佇台灣有人夯中國五星旗,禁止放中國五星旗佇台灣的土地上颺颺飛。