謠言足可惡!beh按怎才好?
Written by 李南衡   
Friday, 02 March 2018

1973年十二月初八,日本愛知縣寶飯郡小阪井町的一名高中女畢業生,講伊真欣羨伊的朋友會tàng佇當地的「豐川信用金庫」上班,伊的一個朋友表情誠神秘講:「免啥欣羨lah,你聽了tio̍h好,準作我秤彩講的,好(hòⁿ別人講Hit間信用金庫最近那像有小可問題,可能有危險。」

當時在場的另外一位朋友轉去厝裡,kā in媽媽講chit-ê秘密消息,in媽媽干單kā伊一個親chiâⁿ講,hit-ê親chiâⁿ去作頭鬃的時kā美容師講‧‧‧m̄知傳幾手了後傳到洗衫店,一個過路人來洗衫店借電話,了後徛teh kah洗衫店頭前話仙,洗衫店頭家偷偷kā伊透露chit-ê秘密‧‧‧。短短六工,超過五千人去「豐川信用金庫」kā全部的存款攏領出來,總金額超過十四億日圓。Hō͘謠言害kah無倒mā半條命。   「謠言」是啥?講tio̍h那像真的,但是無經過證實的一項消息,chit項消息抵抵是逐個khah關心的代誌。謠言有的是無意中秤肜講的,有的是有目的thiau工製造出來的,接收tio̍h謠言的人有可能想講chiah呢秘密的代誌,無講hông知實在真可惜,甚至有人koh添油加味素,一嘴傳一耳,傳kah bē收山。「謠言」無腳會tàng走千里,看你會驚bò͘?今仔日比早前koh khah會hông驚的是,網際網路的出現,手機仔行動網路的發展,m̄-nā電子郵件、部落格、面冊、line等科技攏是傳播「謠言」上好的工具,傳tio̍h緊koh遠。   古早人講:「謠言到有智慧的人tio̍h擋恬。」問題是謠言滿天飛的今仔日,beh去叼位chhōe有智慧的人咧?好佳哉,《自由埘報》徛出來作有智慧的人,每工有一個專欄叫作「謠言終結站」,一工破一項謠言。hō͘ hit項謠言死giān-giān。範圍有政治、醫藥醫療、經濟、社會問題等等。咱以最近所刊出的來講:二月二七,退役上校謬德生,因為突襲立法院抗議「軍人年改」,peh壁跋落來。網路頂面有民眾講伊佇現場親目看tio̍h,指控chit-ê事件是「警察刣人」,民眾講當時有六、七個警察kā jiok。若是無警察kā jiok,伊敢會跋落來?「謠言終結站」查證結果:根據現場側錄的影帶來看,當時並無任何警察kā jiok,繆德生peh壁的時,下面干單有一位警員,koh好心提醒伊:「大哥,hit-ê是軟軟的,會跋落來!」kah自稱目擊者的煽動性講法完全無仝。其他像講,網路流傳講:芎蕉皮煮水泡腳會治高血壓。「謠言絡結站」由衛福部國健署、台大病院北護分院院長出來澄清講,無chit號代誌。網路謠傳因為國際燃料起價,電價會調起,推估電價應該會起10%。「謠言終結站」查證結果,經濟部講電費起落設定上濟3%,bē起10%。   謠言足可惡!《自由時報》設chit-ê「謠言終結站」,咱深深kā說謝!