佇台灣的中國人干單會曉製造反亂!
Written by 李南衡   
Friday, 09 March 2018
 新聞報導,三月初三、初四連續兩工,蘇澳籍漁船「東半球28號」佇咱國暫定執法線東旁,hō͘日本水產廳取締發射水砲趕走,船東表示絕對無越過界,三月初五下晡外交部表示,日本公務船直直jiok koh拍水砲的作法,有khah過頭。 中晝佇台北kah東京同時向日方嚴正抗議。外交部長吳釗燮表示。日方若是執法過頭,咱當然tio̍h強烈抗議,設使是咱漁船有越過界行為,咱mā會處理。三月初五下晡,日本政府回應咱代表處,表示台灣漁船確實有違規情事,代表處已經請日方提出具體證據,而且表示咱mā會同步展開調查。   三月初六漁業局公布「東半球28號」漁船tī chit遍事件中的相關違規情事。漁業署署長黃鴻燕表示,二月二八至三月初三,「東半球28號」以特定漁業出港,三月初一至初三,有入去台日漁業協議海域內作業,但是漁船一定tio̍h經過漁業署核定許可了後,才會tàng進入chit-ê協議海域內作業,「東半球28號」並無佇核定名單內,已經違反「漁船去台日漁業協議適用海域作業管理辦法」第三條。黃署長指出,根據漁業署提供的航跡,顯示三月初三「東半球28號」回程,koh 越過界超出台日漁業協議海域,進入去日本經濟海域,而且koh有作業,才會hō͘日本水產廳jiok koh拍水砲。黃署長指出,三月初三,「東半球28號」轉來蘇澳港了後,隔日載十外名釣客以娛樂船出港,照「娛樂漁業管理辦法」第二一條第一項規定,娛樂漁船活動區域限制佇台灣本島離岸三十海里內,但是三月初四,「東半球28號」駛離本島海岸三十七海里,接近日本經濟海域,koh一遍hō͘日本水產廳公務船jiok koh拍水砲。漁業署表示,「東半球28號」的違規情事、違規事項,會tàng分別核處收回hit隻船的漁業證照、kah幹部船員執業證書一年以下抑是罸款。漁業署近日會請「東半球28號」船主說明後,照事實以法規處置。漁業署署長黃鴻燕真受氣罵講:「好好的台日關係,會hō͘ chit隻船舞歹去!」   三月初七,中華統一促進黨霸先黨部主委陳清峰,不滿日本公務船jiok咱的漁船koh拍水砲,去kā日本台灣交流協會門口的石碑潑紅漆;三月初八,愛國同心會等團體去日本台灣交流協會抗議,手夯「強烈抗議小日本倭寇欺負咱漁民」、「還我漁民應有的權利、銃殺日本走狗」、「日本鬼子及日本走狗滾出台灣」、「恭請大陸海軍保護台灣漁民安全作業」等布旗,大聲喝:「護我漁權」、「日本橫霸」、「嚴厲譴責」、「侵門踏戶」等口號。   佇台灣的中國人tio̍h是chit款,無是非、m̄講道理,生雞卵無、干單會曉烏白花,chhōe孔chhōe縫製造反亂!