朱立倫有夠戇面
Written by 李南衡   
Friday, 30 March 2018

2015年五月初四,中國國民黨主席朱立倫去北京見中國共產黨總書記習近平,比2015年十一月初七,中華民國總統馬英九去新加坡才見tio̍h中華人民共和國國家主席習近平khah早。今年中國國民黨主席吳敦義一直想beh去中國,想beh kah中國共產黨總書記習近平、kah新就任的國台辦主任劉結一見面,新北市市長朱立倫趕三月二六佇上海kah劉結一見面,比吳敦義khah早。

朱立倫想講伊蓋巧,知影吳敦義tio̍h是佇台灣定定tehe講「九二共識」的後面接一句「一中各表」,中國hit旁才會直直拖,無愛hō͘吳敦義去中國。中國一面壓吳敦義的聲勢。一面顚倒邀請中國國民黨前主席朱立倫去中國。   真害的是,無論是bat作過總統、中國國民黨主席的馬英九,bat作過副總統、現任中國國民黨主席的吳敦義,抑是bat作過中國國民黨主席、現任新北市長的朱立倫,攏干單會曉佇台灣騙台灣人,講中國國民黨主張的「九二共識」是一中各表。但是真正抵tio̍h中國大細粒頭人,絕對m̄敢提起「一中各表」。   三月二六早起,新北市長朱立倫kah新任國台辦主任劉結一見面,che是劉結一上任後的一個公開秀,展現中國願意kah認同一個中國原則的「九二共識」的台灣政黨kah團體,積極對話kah協商。Kah以前仝款,支持認同九二共識的中國國民黨,壯大台灣內部koh khah堅定反台獨的力量。家己認為真巧的朱立倫聽劉結一按呢講,想講猶beh轉來台灣,無講兩句話hō͘台灣人聽bē使,伊向劉結一表示:目前兩岸政治情勢比較kah嚴峻,但是對中國國民黨來講,ùi 2008年重新執政了後攏有堅持九二共識,雖然意涵有一寡無仝(m̄敢講一中各表),但是所堅持的原則,逐個攏會tàng互相包容,努力追求兩岸的合作kah和平。朱立倫chit句「雖然意涵有一寡無仝」,隨時hō͘中國媒體「新華社」kā消音。   無論2015年去中國見習近平,抑是最近去中國見劉結一,朱立倫一來表示伊是中國國民黨的老大、中國看重伊,二來為tio̍h 2016年總統大選teh拚命;結果2016年一月十六,總統大選民進黨的蔡英文the̍h 56%、六百八十九萬外票,中國國民黨的朱立倫才the̍h 31%、三百八十一萬外票,輸三百萬票猶有找。仝款情形,chit遍去中國見tio̍h新任國台辦主任劉結一,一來表示伊比吳敦義koh khah受中國看重,二來表示伊佇中國國民黨內上大尾,2020年總統大選當然是伊代表中國國民黨參選。咱攏知台灣的總統大選,選票全部佇台灣人民手底,kah中國一點仔關係都無,有時kah中國行傷倚,顚倒會hō͘台灣人驚tio̍h,煞無票。   一個巧巧人朱立倫,咱才會講伊「有夠戇面」!