台北市長猶未選,tio̍h看出民進黨中央無志無氣!
Written by 李南衡   
Wednesday, 11 April 2018

 今年十一月二四,全台灣九合一大選。台北市kah新北市兩市的市長候選人,到今仔日四月初九,民進黨中央猶koh心頭掠定,特別是台北市長,到底是beh家己提名候選人、抑是照2014年的模式讓柯文哲kah中國國民黨提名的候選人去拚,引起民進黨基層支持者相當不安koh 爽,謠言滿天飛。

四月初二,民進黨中央秘書長洪耀福講三月二七,黨主席蔡英文kah海外獨派團體見面的時,有講起首都台北市長的選局。洪秘書長講伊佇會中有分析,第一種是民進黨推出真強的人選,最後kā中國國民黨候選人kah柯文哲攏拍倒;第二種狀況是民進黨提出的人選無夠強,最後kā柯文哲giú落來、hō͘中國國民黨當選去;第三種狀況是民進黨推出的人無夠強,最後是kah中國國民黨作夥落選,由柯文哲當選,若是按呢,柯文哲tio̍h會變作台灣上大尾。 民進黨秘書長洪耀福完全胡言亂語。黨中央抑是洪秘書長所講的候選人「無夠強」非常無道理,in干單根據民調kah家己主觀的偏見來作判斷。2014年民進黨桃園市長候選人鄭文燦,是民進黨中央看衰的、典型的「無夠強」的候選人,開票中,鄭文燦拍電話去黨中央講伊有可能會當選,黨中央的反應是冷笑講:「會當選哦?恭喜lah!」仝hit年民進黨新北市長候選人游錫堃mā是hō͘民進黨中央看衰的、典型的「無夠強」的候選人,照民調預測,kah拚連任的中國國民黨候選人朱立倫競選至少會輸二十萬票,致使黨中央無認真輔選、完全「放牛食草」,結果干單輸兩萬四千外票。民進黨黨中央目睭糊tio̍h蜊仔肉,那看會準咧?   2014年台北市長選舉,民進黨所讓的柯文哲大嬴中國國民黨的連勝文24萬4千外票、嬴17.34%,最新的民調,柯文哲干單嬴中國國民黨丁守中3、4%;頂遍台北市長選舉,柯文哲得的85萬3,983票內底有八成是民進黨的支持者約六十八萬票,淺藍kah白色的選柯文哲干單十七萬外票,柯文哲有啥thang好驚伊?2014年台北市民進黨市議員the̍h 576,539票、39.87%,2016年總統大選民進黨的蔡英文the̍h 757,383票、51.96%,中國國民黨的朱立倫the̍h 546,491票、37.49%,親民黨的宋楚瑜the̍h 153,804票、10.55%。民進黨teh驚啥?   今年台北市長選舉若是三腳tu,民進黨kah中國國民黨的支持者,攏轉去支持家己的候選人,柯文哲的支持者chhun偌濟?選了伊會變作上細尾的。2018年台北市上細尾的,2020年啥人會去插伊?台灣上大尾的當然是蔡英文總統。   台灣俗語講,「有人是破病死去的,有人是驚死去的。」民進黨中央有一陣人無志無氣,猶未選舉tio̍h驚死佇hia。可憐!