啥人kā柯P抹kah紅phà-phà?
Written by 李南衡   
Monday, 07 May 2018

2017年九月十九日《中時電子報》報導:台北市長柯文哲接受訪問的時,記者問伊ùi墨綠到淺紅,是是有sêng變色龍?他講:Che 真歹回答,因為beh抹烏柯文哲真難,所以只好用抹紅的。

 2018年一月二三《蘋果日報》報導:昨昏身兼民進黨主席的總統蔡英文tī接受電視專訪時有提起,柯一定tio̍h對「台灣價值」koh做一遍確認,hō͘民進黨的支持者感覺柯是一位會tàng作夥作戰的人。咱會tàng體會蔡主席的善意。問題是柯P的第一個反應是:我mā想beh知影蔡英文伊的「台灣價值」是啥物?伊明明是teh tèⁿ-khong假siáu!第二工《聯合報》報導:柯文哲講:總統kah市長「路無仝」、「處理的問題mā無相siâng」,總統tio̍h去處理國安、外交、統獨兩岸,但是台北市長m̄免,「懸度無仝,每人的想法mā無仝」。   今年二月初一,台北市長柯文哲去「歐洲議會」演講,伊是第一個佇歐洲議會演講的台灣縣市首長。柯文哲市長演講專工提出「台北價值」,但是死to̍h m̄講「台灣價值」,因為伊實在驚伊的中國頭家聽tio̍h「台灣價值」會無歡喜。   柯P若是真正想講統獨兩岸m̄是市長的代誌,舊年七月柯市長去上海參加「台北上海雙城論壇」,伊tio̍h無應該kah上海市長應勇致詞的時,無相約koh會仝款提起「兩岸一家親」、「兩岸命運共同體」等言論。照柯市長講「統獨兩岸」是總統的工課,一個台北市長明知koh kah人講「兩岸一家親」、「兩岸命運共同體」是犯tio̍h「僭越」(chhiàm-oa̍t)之罪,是按怎伊一定tio̍h愛講咧?因為chit兩句話是中國共產黨總書記習近平發明的,中國大大細細的官員、包括最近上台的中國國務院台辦主任劉結一,接見新北市長朱立倫的時mā強調chit兩句口號,連中國國民黨的新北市長朱立倫都無hiah呢bē見笑,無直直餾chit兩句口號。   有記者問柯市長,「兩岸一家親」、「兩岸命運共同體」chit兩句口號,敢bē使收回?柯市長應講,話講出去ah,beh按怎收回?但是伊講的另外一句話、講兩岸那像「床頭拍床尾和」,一下hông攻擊,伊緊講:「我收回好lah!」因為chit句話是伊家己烏白「落下頦」講出來的,並m̄是中國頭人所講的,伊當然會使收回。中國頭人講的「聖旨」,柯文哲絕對無收回的可能。無,伊那會hiah紅?   其實,柯P有回答無回答蔡英文主席的問題,有講無講「台灣價值」煞已經變作一點仔意義toh無,因為民進黨的支持者絕對無可能含目屎、含血、含恨去選一個chiah呢紅的市長候選人柯P!   啥人kā柯P抹kah紅phà-phà?柯P本人!  (180504)