對台北市綠營的支持者來講,柯文哲是khioh ka̍k去ah!
Written by 李南衡   
Wednesday, 09 May 2018
 五月初九下晡,台北市長柯文哲佇副市長陳景峻陪同下,來咱「綠色和平廣播電台」接受主持人陳雨鑫的專訪,希望柯市長會tàng盡量說明清楚,減少誤會。 專訪兩個重點:第一,伊對「兩岸一家親」感覺bē爽的民眾講一聲「歹勢」。第二,伊講設使總統蔡英文2010年若競選連任.「我當然會支持伊。」五月初九暗,台北市政府直直拍電話hō͘各媒體,一再強調市長「無道歉」,最後ko̍h發出新聞稿講,柯市長並m̄是為tio̍h「兩岸一家親」的講法道歉,是干單為聽tio̍h chit句話感覺bē爽、無歡喜的人,講歹勢。柯市長是按怎tio̍h kā「兩岸一家親」chit句話攬tiâu-tiâu?因為「兩岸一家親」是中共總書記習近平講的話,伊的話tio̍h是聖旨!柯文哲真清楚,伊若為tio̍h講「兩岸一家親」chit句話kā台北市民會失禮,一定會hō͘ in中國的頭家khia̍k頭殼!無錯,第二工五月初十下晡,針對柯文哲先會失禮、而後ko̍h再澄清chit件代誌,中國國台辦發言人安峰山講:「阮有注意tio̍h台北市方面已經有作出澄清」。伊減講一句:「按呢有乖!」   2017年九月二三,台北市柯文哲接受「三立電視台」李天怡的專訪,李小姐問伊原本自稱是「墨綠」,是按怎佇「雙城論譠」卻提出「兩岸一家親」,政治立場是m̄是有改變?身為台北市長那會講出chit種字眼?柯市長應講:「總比兩岸一家仇好啊!」柯市長無解說講因為chit句話是中國頭人習近平的聖旨。   柯文哲市長完全無看tio̍h台灣人對惡刺刺的中國,食飽閒閒駛航空母艦chhōa一陣戰艦佇台灣四箍圍趖來趖去,一陣戰鬥機佇台灣外圍飛來飛去,koh佇對岸安裝兩千外粒的飛彈向台灣,那像一陣m̄成囝仔一日到暗佇咱門口夯刀弄銃。偌呢受氣!而且無論佇外交上抑是國際活動頂面,想盡步數阻礙凌遲咱台灣。咱台灣人早早tio̍h覺悟台灣kah中國是「一人一家代,公媽隨人chhāi。」咱kah中國根本to̍h 無仝「國」,beh那有啥物「一家親」「一家仇」的問題?   五月初九暗,柯文哲koh推kah離離離,伊講家己除了「兩岸一家親」chit句話以外,攏無koh講啥!柯文哲,拜託mài假khong tèⁿ戇。對一個歹厝邊,你講台灣kah中國是「命運共同體」,良心hō͘狗咬去mā bē講出chit種出賣台灣人的話。柯文哲那講會出來?因為chit句兩岸「命運共同體」mā是習近平講的。   佇電台專訪的時,伊講設使總統蔡英文2010年若競選連任,「我當然會支持伊。」第二工各新聞媒體,講柯文哲是向蔡英文總統釋出善意。啥善意?2018年台北市長大選,藍綠兩營的支持者攏歸隊,雙平攏差不多四成外,若競爭激烈,柯文哲會hông挾一下變作「仙尪仔脯」,2020年siáng猶會記得柯文哲是啥人?
Last Updated ( Tuesday, 15 May 2018 )