知足kah私心
Written by 李南衡   
Tuesday, 10 July 2018

 新的年金制度七月初一開始實施。雖然有真濟人對年金改革不滿而且引起抗爭,抗爭作你抗爭,總是好佳哉tio̍h是因為年金改革完成,各種年金才免得幾年內相續破產、逐個攏領無錢。年金改革會引起無仝的看法,因為每一個人的生活態度無相siâng。一個人退休了後,到底每個月tio̍h開偌濟才活會落去?

明道大學前校長陳世雄認為,家己的退休金雖然ùi十萬hông刣到七、八萬,但是chit-má m̄免做工課卻會tàng領chiah-ê錢,「真合理、真感恩、有夠用tio̍h好!」 伊講,過去台灣的軍公教人員差不多免繳稅,退休猶會tàng領比勞工、農漁民koh-khah濟,che是社會的無公平,而且過去十六年來台灣的GDP成長三十五%,但是勞工、農漁民的薪資並無起。Hō͘薪水khah少的少年人來養飼退休金領khah濟的老人,少年人一定會感覺無公平、未來無希望,所以年金才tio̍h改革。  

 隨時有人佇陳世雄的面冊頂面罵伊phô͘政府的尻川、數想beh作教育部長抑是總統府資政;當然mā有真濟人kā伊謳咾。上古錐的是伊的學生,稱讚伊是英雄,是真正行過地獄的人,看過hia有一陣永遠bē滿足的枵鬼!   

另外一個例是清華大學榮譽教授李家同,伊收tio̍h退休所得重算處分書了後,有寫三張批的文章講伊的心情,講看tio̍h家己的退休金hông減三、四成,伊真傷心,誠有「晚景淒涼」的感覺,已經無法度koh去美國參加同學會ah!

事實上李家同教冊年資超過三十年,目前每個月的退休金有十萬出頭,七月初一年金改革開始實施,猶會tàng領75%將近八萬,逐年降,十年後會降到60%每個月猶有六萬七千元,到hit陣mā無影慘kah「晚景淒涼」。  

 有一位退役少校跳出來支持年金改革,照原本制度計算伊月退俸是五萬六千元,七月初一開始實施新的年金制度,伊初步試算是領四萬兩千元,會減領一萬兩千元。伊講家己已經退休了,逐個月猶teh領五萬外,領比當teh上班的少年人koh khah濟,錢雖然領khah濟真歡喜,但是實在是無合理。  

 新的年金制度軍人月退俸上低保障金額是三萬八千九百九十元,比公教人員最低保障金額三萬兩千一百六十元khah濟,「八百壯士」猶teh枵飽吵,實在m̄知意思。最近中國鎮江市退伍的解放軍佇市政府門口抗議煞hông拍,解放軍退伍了安排佇國營機構上班,最近chit幾年國營機構倒的倒、關門的關門,in煞變作失業遊民、一點仔保障都無。In的問題一概由地方政府負責,地方政府無錢mā哀哀叫。若退伍beh一遍領清,大約有人民幣八萬元(約新台幣四十萬)。佇台灣的退伍軍人m̄知珍惜家己的幸福,猶teh抗議。唉,實在是皮面食m̄知飽!   (180706)