中國烏心疫苗會hông驚!
Written by 李南衡   
Monday, 30 July 2018
  七月二二拜六,中國微信公眾号推捒出的一篇文章〈疫苗之王〉,牽動tio̍h千千萬萬中國民眾的心。文章公布一間中國大型疫苗公司長春長生,佇生產siáu-狗病疫苗過程中造假;Koh-khah hō͘人煩惱的是:Chit間公司所生產的一批百白破(百日咳、白喉、破傷風)三合一疫苗無達標準,二十五萬支問题疫苗已經銷出、而且已經拍入去二十五萬兒童的身軀。

這篇文一下發出來,隨時轟動社交媒體。一時之間,「疫苗」成作引爆中國民眾憤怒情緒的上敏感話題。雖然hit篇文因為「內容違規無法度查看」隨時hông抽掉,但是伊所提出的「疫苗」問題,已經成作中國各大媒體關心的焦點。   

中国政府網七月二二禮拜日,有刊出李克强總理的批示,要求「盡快查清事實真相」,hō͘民眾一個「安全、放心、thang信任的生活環境」。

 Ùi 2017年十一月初三講起,國家食品藥品監督管理總局有對媒體講,長春長生生物科技有限公司tī 2016年五月生產二十五萬兩千六百支「百白破」疫苗,流向山東省疾病預防控制中心;武漢生物製品研究所有限公司tī 2016年七月生產四十萬五百二十支「百白破」疫苗,流向重慶市kah河北省疾病預防控制中心,合起來有六十五萬外支,攏是「效價指標無符合標準規定」。今年七月十五,中國國家藥品監督管理局通告,對長春長生進行檢查,發現長春長生佇siáu狗病疫苗生產過程中有紀錄造假的事實,嚴重違反「藥品生產質量管理規範」。Hō͘人僥疑的是吉林省藥監局舊年十一月tio̍h對「百白破」疫苗問題作調查,是按怎拖九個月才公開處罰決定,但是mā猶無公布有問題的疫苗生產紀錄kah收回狀況。今年七月又koh再傳出疫苗出代誌。因為中共宣傳部門嚴格控制輿論,koh khah引起人民的驚惶不安,甚至有人唱聲beh chhōa囝仔去香港、日本抑是台灣注射。   

Chit-ê消息引起台灣人兩點的疑問,第一,咱敢有向中國買過疫苗?衛福部疾管署副署長莊人祥表示國內的疫苗攏是向國際大廠進口,自了m̄-bat向中國買過疫苗,請民眾安心;而且台灣接種的是五合一抑是六合一,無三合一疫苗。第二,有人問講中國人若拚拚來台灣注射beh按怎?衛福部疾管署講,公費疫苗有限定本國籍加入健保的人,咱kah藥廠有長期簽約,無供應的問題。若像幾年前中國牛奶粉出問題,真濟中國人拚去香港掃kah香港囝仔無牛奶粉thang食。中國人若溢入來台灣注預防射beh按怎?衛福部疾管署講bē有chit種情形發生,因為咱自費的供應量有限,中國人來mā無法度供應。Chit點mā請逐個放心。   

啥物攏beh做假的歹厝邊中國人,會hông驚。咱無時時警戒煞bē使得!

Last Updated ( Monday, 30 July 2018 )