中國國民黨中央tio̍h有幾粒日頭?
Written by 李南衡   
Tuesday, 07 August 2018

 九月二八,「財團法人馬英九文教基金會」成立、舉行茶會,中國國民黨重量級人物攏總到。馬英九成立基金會hō͘真濟人解讀講是,馬英九有koh再數想總統大位的態勢。而且中國國民黨中央當teh紛亂的chit-ê時陣,恐驚會成作第二個黨中央,變作另外一粒日頭。

中國國民黨主席吳敦義接受訪問的時講,伊kah馬總統熟似chiah濟年,長期作夥,非常尊重、感謝馬總統。記者問講馬英九是m̄是teh kā你逼宮?吳敦義強調講:「無,無chit號代誌!」記者追問講,你敢bē煩惱馬英九基金會成立了後煞變作中國國民黨第二個黨中央?吳敦義真嚴肅真條直講:「Bē!黨中央永遠干單一個!」有記者問馬英九前總統,伊成立「財團法人馬英九基金會」,是m̄是變作中國國民黨第二個黨中央?馬英九應講:「黨中央只有一個。」中國國民黨內底有吳敦義、馬英九kah朱立倫三個頭人,是m̄是黨內會變作有三粒日頭的態勢?朱立倫表示講:「日頭愈(jú)濟愈好。」咱實在m̄知朱立倫新北市長那會按呢講,是m̄是teh暗示中國國民黨中央傷過烏、過頭暗,有需要khah濟日頭來照hō͘光?   

中國國民黨的歷史,bat出現過兩粒日頭。九十年前的1927年,中國國民政府當teh北伐期間,中國國民黨內部以南京蔣介石作頭、主張清除共產黨勢力,kah以武漢汪精衛作頭、主張容允共產黨勢力,兩旁分裂,因為南京簡稱「寧」,武漢簡稱「漢」,歷史kā chit遍的事件叫作「寧漢分裂」。四月十七,佇武漢的中國國民黨中央宣布撤銷蔣介石的國民革命軍總司令職務、koh開除黨籍。佇南京的中國國民黨的中央執行委員,包括胡漢民、蔣介石kah部分監察委員宣布佇南京koh組一個國民政府,推胡漢民作主席,寧漢正式分裂。四月二一,軍事委員會ùi廣東遷到南京,蔣介石發表《告全體將士書》。四月二二,武漢國民政府中央汪精衛、孫科、宋慶齡等聯名發表通電,斥責蔣介石分裂行為,形成「寧漢對立」。五月中,經過李宗仁kah朱培德佇中間chhiâu-chhe̍k,才避免雙方相戰。   

中國國民黨前主席、新北市長朱立倫那會講「日頭愈濟愈好」hit種三八話?伊真正無讀過中國冊?中國真濟本古冊攏有記載「后羿(hō͘-gē)射日」的神話故事:帝堯的時,天頂出現十粒日頭,苦旱kah所有的農作物攏焦死去,草木mā攏bē活,老百姓無物件thang食,帝堯派后羿去kā日頭射落來。后羿射落來九粒日頭,干單chhun一粒留佇天頂。自按呢百姓才有平安的日子thang過。朱立倫講「日頭愈濟愈好」,m̄知中國國民黨中央tio̍h有幾粒日頭,中國國民黨員才會tòng bē-tiâu喝哀?出一位勇士去kā幾粒日頭射落來?咱好奇teh看發展。