柯文哲是習近平的布袋戲尫仔!
Written by 李南衡   
Wednesday, 03 October 2018

   2007年至2015年咱台灣駐法國大使呂慶龍,͘法國方面嘔咾是台灣國際公關風格轉型的第一人,有兩個城市頒贈「榮譽市民」͘伊,有一個城市圖書館門口hit條街號伊的名。呂大使若有機會,一定隨時帶佇身邊的兩仙台灣布袋戲尫仔the̍h出來挵,布袋戲尫仔趣味的對話引起所有的貴賓笑hai-hai。兩仙台灣布袋戲尫仔那會曉講法國話咧?因為挵的人是法國話一流súi的呂慶龍大使。

1970年三月,台視開始播出黃俊雄主演的台語布袋戲「雲州大儒俠」史艷文,每工中晝播出的時,台灣人停止做工kah歇睏,攏teh顧看史艷文,收視率九成。中國國民黨政府看台灣人chiah呢愛看台語發音的史艷文,相當bē爽,搬到583集、1974年六月,用「妨害農工正常作息」的理由下令禁播。無偌久台視申請改用華語發音搬史艷文,無人愛看、無幾集tio̍h收擔。是按怎史艷文講台語講kah hiah好聽,講華語mā講kah hiah滑溜?是挵的人黃俊雄m̄是史艷文。   

最近名政論家金恒煒發表一篇〈柯文哲是習大大的布偶〉,誠厲害,瞭解柯文哲hiah深入。原本中國對台統戰,扶持中國國民黨的連戰hit陣人。2014年底台灣九合一大選,中國國民黨失去台北、桃園、台中三個市長, 2016年總統大選,民進黨蔡英文得56.12%,中國國民黨朱立倫才得31.04%,立法委員民進黨得68席頭一遍過半、中國國民黨才35席,中國國民黨koh大輸。中國共產黨對台灣的中國國民黨大大失望,當teh頭殼疼的時,台北市長柯文哲去上海參加雙城論壇,隨時宣讀習近平的聖旨:「兩岸一家親」、「兩岸命運共同體」,習近平聽了龍心大喜。Koh看柯文哲講話無清無楚,身份曖昧,連鞭講是深綠的,koh是白的,講話足紅,koh那像藍的,chit點習近平有滿意,上合意是看伊無骨頭,是上好的布袋戲尫仔的料,會使作中國佇台灣的代言人。果然,出在習近平按怎挵,隨時聽tio̍h chit仙布袋戲尪仔佇台北市講習近平的話。像講「2020東京奧運台灣正名公投連署」,公投連署超過52萬份。中國攏猶未講半句,柯文哲市長隨時發言講中國的話:「大陸對台灣的打壓會愈來愈強,上界bái的情形是台灣bē-tàng參加東京奧運。」八月十五,中國中央電視台用兩分半鐘,專題報導柯文哲連任台北市長的策略,講伊若當選台北市長tio̍h有可能競選台灣地區的領導人。報導的時間若算作廣告tio̍h幾若千萬。柯文哲足得意講伊無付半錢廣告費。柯文哲teh煉siáu話,黃俊雄廣告史艷文,那有叫史艷文出廣告費的理由?   

習近平挵的chit仙布袋戲尫仔若騙過台北市民,hō͘伊連任台北市長,習近平一定會kā挵kah競選台灣總統。若hō͘當選,台灣人才來後悔,beh哭都無目屎!
Last Updated ( Wednesday, 03 October 2018 )