巧巧柯P,戇話講bē煞!
Written by 李南衡   
Tuesday, 06 November 2018

 台北市長柯文哲,逐個叫伊「柯P」,伊家己講伊的智商真懸,定定誠驕傲講伊是第一名、學問好。連in老母to̍h講姚文智學問無柯文哲hiah好。有人講P是聰明人,咱台灣話是講伊「真巧」。既然是巧巧人,那會定定teh講戇話咧?若有人閒閒無代誌,用一點精神kah時間,蒐集整理出版一本「柯P戇話集」,一定真精彩、有真濟人愛看。

咱干單舉最近的一個例,你tio̍h知影伊講的話m̄是普通的戇。   

十月二八下晡,台北市長柯文哲去北投參加眷村文化座談會,過程中有談tio̍h執政黨處理轉型正義的時,柯P直剖講,轉型正義應該是先解決目前的問題,煞落去是預防koh再發生,最後才來追究責任。假使轉型正義第一步tio̍h追究責任,按呢會舞bē煞,伊猶teh為婦聯會講話:「Chit-má to̍h運作kah好好,以後mài koh發生,你(黨產會)管伊過去創啥?」現場響起熱烈拍pho̍k-á聲。柯文哲強調,伊家己後來mā發現,通常第一個第二個問題若解決掉,第三個問題tio̍h免講ah。「既然bē-koh發生,也無啥thang處理」,若是伊來處理婦聯會的問題,mā會是chit種態度。   

柯P chit種講法,那像以前有一陣土匪來咱庄頭搶劫,警察局長是in換帖的,法院是in表的開的,咱一點仔辦法都無。今仔日警察局長換人,法院mā m̄是in表的開的ah。咱講beh kā土匪kā咱搶去的385億討轉來,警察局mā答應受理beh重新調查chit件搶案。糊塗鄉長講,in hit陣人也開病院、也辦學校、mā有賑濟別人,chit陣in運作kah好好,以後mài koh搶人,你管伊過去beh創啥?借問柯P,你若是咱chit庄hông搶過的人,你聽了敢bē phùi血?   

每工都有真濟人向柯P提出質疑、攻擊、侮罵,那像海湧一直溢過來,甚至有人叫伊退選台北市長,講伊無資格作台北市長。頭起先柯P講真歹勢,是伊「錯誤的援引例證」,但是那像逐個猶m̄放伊煞,十一月初一,柯P才對記者講,「坦白講,婦聯會teh創啥,我mā無清楚。」無清楚koh敢大聲講戇話為in!

柯P講戇話的SOP是,戇話講出嘴,若無人the̍h出質疑抑是抗議,tio̍h想講伊講了真讚;若有人kā罵抑是抗議,看聲勢按怎,若大kah伊載bē-tiâu,伊會頭殼jiau-jiàu咧會失禮,講伊話講m̄-tio̍h。伊通常是佇大街路大聲講戇話,逐個攏有聽tio̍h、佇巷仔底細聲會失禮,無幾個人聽tio̍h。你若聽tio̍h伊koh teh講啥戇話,m̄免感覺奇怪,伊久久無講戇話,你才tio̍h問講那會按呢?   

巧巧柯P,戇話講bē煞.。咱敢會使koh選hō͘戇話講bē煞的人作台北市長?