政府按怎做才tio̍h?
Written by 李南衡   
Friday, 30 November 2018

照民主政治的常識,執政者若beh拚連任,tio̍h看伊的成績。事實上無抵抵正確,上好的例是陳水扁台北市長任內,台北捷運完工通車、宣示一年通一條,服務人民的櫃台放低等,施政滿意度超過七成。今年二月有人作民調,陳水扁的滿意度嬴過後來的馬英九、郝龍斌、柯文哲三位市長濟濟,滿意度低低的攏有連任。任內滿意度懸á是按怎?阿扁市長鐵腕掃黃、掃黑,取締電玩業kah八大行業、拆除違章建築,得罪傷濟人,1998年拚連任輸hō͘中國國民黨的馬英九。

咱干單用上界近的2016年總統大選兩都得票情形,kah chit遍選舉兩都市長得票的情形作一個比較。新北市總統大選,民進黨的蔡英文得一百十六萬五千外票、中國國民黨的朱立倫得七十萬九千外票;Chit遍市長選舉,民進黨的蘇貞昌得八十七萬三千外票、中國國民黨的候友宜得一百十六萬五千外票。Hit陣chit陣仝款是朱立倫作市長,kah朱市長施政無關係,是按怎情形顚倒反?台中市總統大選,民進黨的蔡英文得七十九萬三千外票、中國國民黨的朱立倫得四十三萬外票;Chit遍市長選舉,民進黨的林佳龍得六十一萬九千外票、中國國民黨的盧秀燕得八十二萬七千外票。林佳龍市長作了誠好,而且台中花博hō͘逐個謳咾喝讚,是按怎會輸kah chiah悽慘咧?上好的理由是怪中央施政拖累tio̍h地方選舉。   

蔡英文的中央政府敢有影做kah hiah bái?無影。立法院通過台灣歷史上大的減稅案,大大提高標準kah特別扣除額,未來月薪若無三萬元的人攏免納稅,有542萬食頭路人會得tio̍h好處。台灣歷史有叼一位總統減人民的稅金?蔡總統任內兩年外經濟繁榮,舊年2017年外銷訂單超過美金四千九百外億、是歷史上懸的;平均失業率3.76%,是2001年以來上低的;舊年2017年台灣股市徛起去一萬一千點,是二十八年來上懸的。M̄是馬英九政府財政部長尹啟銘講台灣的股市會上一萬點,完全m̄-bat到一萬點,尹大人煞講he是選舉語言。蔡英文總統發展綠色能源,m̄-nā解除核電危機,koh會táng發展清氣的能源、顧守台灣的環境。蔡政府做真濟對台灣人誠好的施政,真濟人民想講政府原本tio̍h應該按呢。   

年金改革會tàng hō͘年金mài破產,hō͘以後退伍退休的人猶會tàng領tio̍h退伍退休金,今年七月初開始實施。目前已經有享受18%優惠存款的有四十二萬人、目前猶在職原本日後退休會tàng享受18%優惠存款的有四十萬人,鬥起來有八十二萬人,18%優惠存款會慢慢無去。八十二萬人一個家庭算四個人,tio̍h有三百二十八萬人真受氣,遍佈全台灣用選票表示不滿,看你按怎選mā bē嬴。

問題是每一個台灣人應該想的是,政府按怎做才tio̍h?