蔡英文超霸氣講:「加薪m̄免拾tioh銃!」
Written by 李南衡   
Wednesday, 23 January 2019

正月初九下晡即時新聞報導講,蔡英文總統前幾工火力全開對中國唱聲,hông謳咾講是「小英拾khiohtio̍h ah」蔡總統chit兩工面對「發紅包」爭議,佇伊的面冊頂面強勢捍衛家己的立場,今仔日一句「加薪免拾tioh銃!Koh一遍引起網友熱烈議論,有人好奇問講「tioh銃是啥物咧?

 

講來話頭長。「拾tioh銃」是現代台灣網路的用語。代誌發生tī 1980年代尾1990年代頭hit段時間,若有人chah銃hō͘警察查tio̍h,上界通用的理由是「我拾tio̍h-ê」。1989年十月二四,立委余政憲、許國泰質詢提起,今年正月至七月有發生九十幾件綁票案,hông銃殺的有四十外人,甚至烏銃塞倒街,兩萬元tio̍h會tàng買tio̍h銃。內政部長許水德答詢講「Chit幾工咱行路的時,真正會拾tio̍h銃。」害全立法院議場笑bē煞。「行路都會拾tio̍h銃」mā成作hit陣台灣治安足bái的代名詞。歌手沈文程佇「1990台灣人」hit首歌唱講,「莫怪許sàn對咱大家講,出門小心m̄-thang踏tio̍h銃」tio̍h是teh供(keng)體許水德。  

Ùi按呢衍生出來,上起初「拾tio̍h銃」的意思是「講白賊」、「膨風」。慢慢仔變作(因為有拾tio̍h銃)講話敢大聲,講話語氣誠chhèng。總統府發言人黃重諺解釋「拾tio̍h銃」,是電玩族kah網路族群的用語,意思是「免靠運氣」,那像teh拍電競的時hông電kah beh死beh死的情境。咱若知影「拾tio̍h銃」chit句話的由來kah無仝時陣的各種用法,按呢你若koh聽tio̍h人teh講「拾tio̍h銃」,你tio̍h bē那像鴨仔teh聽雷gāng-gāng。   

正月初二下晡,蔡英文總統回應中國國家主席習近平的講話,伊講:阮自了m̄-bat接受「九二共識」,根本原因tio̍h是北京當局所定義的「九二共識」,其實tio̍h是「一個中國」、「一國兩制」。我beh重申,台灣絕對bē接受「一國兩制」,絕大多數台灣民意mā是堅決反對「一國兩制」,che mā是「台灣共識」。 蔡英文總統一向hō͘台灣人嫌傷軟chiáⁿ,伊chit遍回應習近平主席強koh有力,確實hō͘真濟台灣人感覺誠意外koh誠歡喜,才會講「小英拾tio̍h銃ah!」

蔡英文總統最近面對「發紅包」爭議連發面冊,強勢捍衛家己的立場。正月初九,蔡英文總統佇伊的面冊頂面寫講:「加薪m̄免拾tio̍h銃,馬政府的22K,蔡英文已經kā伊送入去歷史的火灰內底。包括基本薪資調升到23,100元、起15%,時薪調升到150元、起25%。

無管蔡總統有拾tio̍h銃抑無,加薪tio̍h拾tio̍h銃抑免,台灣人上歡喜的是蔡總統勇起來強起來。Tio̍h的時,講話kah做代誌仝款有霸氣,台灣tio̍h有救ah!