真正“atama kòn-ku-rí”的是柯文哲!
Written by 李南衡   
Wednesday, 03 April 2019

 三月十六,台北市長柯文哲beh啟程去美國訪問,全美台灣同鄉會指控柯文哲「九大罪狀」,而且發布「不接待」聲明。柯文哲直剖講,對chiah-ê指控非常感冒,伊講「無法度理解意識形態會hō͘人變作義和團,阿達馬孔固力!」

2003年李前總統阿輝伯bat罵某人“atama kòn-ku-rí”,第二工幾間媒體攏teh談論啥物是「控固力」?真濟台灣人攏知影「控固力」是混凝土。第二次世界大戰前kah戰後初期,台灣人用台灣式日語罵人“atama kòn-ku-rí”是講hit-ê人的atama(日語頭殼)親像kòn-ku-rí混凝土hiah呢碇,咱台灣人是罵講「塞頭」(cha̍t-thâu)。日本漢字「混」(念作kon),「凝」(念作kori),「土」(念作to),明治末期傳來到日本的chit句外來語concrete,日本人kā伊譯kah音意攏足súi的「混凝土」三個日本漢字,實在hō͘人真欽佩!   

四年前beh競選台北市長的柯文哲去美國訪問的時,全美台灣同鄉會出錢出力四界接待伊、替伊造勢。四年來in看柯文哲台北市長的種種表現,真失望真慼心,講柯文哲變作「親中反美」的態度kah全美台灣同鄉會的價值牴觸,才會罵柯文哲是投機客,聲明柯文哲訪問美國的時不支持不接待。柯文哲市長講無beh接待發表聲明太奇怪!其實太奇怪的是柯文哲,全美台灣同鄉會既然發表hiah呢歹聽的九點聲明,柯文哲若家己認為無hiah呢歹,應該一條一條提出來反駁。若有理,相信全美台灣同鄉會有可能發表聲明kā柯文哲會失禮,熱烈歡迎接待伊。咱干單問柯文哲伊tòe中國國家主席習近平講「兩岸一家親」,beh按怎解說?  

 三月十九佇布魯金斯研究所kah AIT前主席卜睿哲等人進行門關起來的會議,談論兩岸問題,其實tio̍h是美方的口試。會後,戰略kah國際研究中心專家葛來儀質疑,柯文哲雖然有提出「親美友中」,m̄-koh美方想beh koh khah知影細節,柯文哲所講的「友中」是和平條約?抑是接受九二共識?簡單講tio̍h是兩岸一家親嗎?柯文哲“atama kòn-ku-rí”才會想講全世界的人攏無伊的頭殼好,其實美國專家看出出柯文哲teh想啥,美國hiah-ê劍仙那是hiah好騙的?   

Chit幾工台北閙熱滾滾的一個話題,是頂日台北市政府副發言人、人稱呼伊「學姊」的黃瀞瑩佇一個政論節目中講:「統獨是假議題」、mài去談i,引起熱議,hông釘kah走無路。第二早起,台北市長柯文哲講,伊其實是一個學妹lah,伊猶未三十歲。那會tàng期待一個少年人tī短時間內,講出一大堆咧?  

 咱發現無論家己講智商(IQ)157的人,抑是人講伊猶未三十歲的人,攏有可能是“atama kòn-ku-rí”!