Chiah呢霸氣的蔡英文,正是咱的總統!
Written by 李南衡   
Wednesday, 10 April 2019

  三月三十一,中國解放軍派出兩台戰鬥機飛過海峽中線,對台採取無事起空行動,咱軍緊急派出幾若台軍機飛起去kā cha̍h,那像《聖經》的記載,魔鬼佇曠野試探耶穌,耶穌講:「撒旦,退去!」Tùi按呢魔鬼tio̍h離開伊。咱空軍一直叫伊退去!十分鐘後中國戰鬥機才飛倒轉去海峽中線以西hit,路尾才轉去in的基地。中國解放軍戰鬥機比魔鬼koh khah纏。M̄-nā中國軍機動向全程攏佇咱的掌控,而且。無論咱的軍艦頂面、抑是地面的飛彈攏拍開,一直向hit兩台飛過中線的「殲十一」戰鬥機,kah飛佇邊仔無過中線的六台戰鬥機tiâu-tiâu,萬一兩三分鐘tio̍h飛到台灣本島,咱有精準的飛彈等beh伺候in

四月初一,中國官方報紙《環球時報》發表社論講,中國自了m̄-bat承認海峽中線,未來有可能會kā歸個台灣海峽攏變作解放軍的行動區域,甚至kā台灣島上的空域mā攏劃入去解放軍巡航範圍。  

四月初一,蔡英文總統佇伊的面冊頂按呢講:國軍有充分萬全的準備,鞏固2,300萬人民選擇自由民主的生存權利。伊koh講,我已經下令軍方,對thiau故意飛過中線chit旁來的無事起空。一定tio̍h tī第一時間強勢kā趕出去。蔡英文總統今仔日對中國解放戰鬥機飛過來海峽中線chit旁表達嚴正抗議,蔡總統提醒北京當局「三不要」,不要無事起空、不要製造事端、不要試圖破壞台海現狀。伊講身為總統,mā會kah國軍戰士作夥奮鬥到底,「國土一寸都無讓」。   

針對蔡英文總統四月初一強調,「已經下令軍方,對thiau故意飛過中線chit旁無事起空,一定tio̍h tī第一時間強勢kā趕出去!」四月初二,中國外交部例行記者會,有記者問講中國外交部有啥看法?中國外交部發言人耿爽氣phut- phu講:「伊的胡言亂語、狂言妄語,實在hō͘人真氣憤!」   

四月三,美國國防部亞太助理部長薛瑞福表示,解放軍chit遍的行動是有計畫的,目的是「恐嚇台灣」,美國反對chit種行動。   

咱來聽台灣政治人物對中國解放軍戰鬥機侵門踏戶chit件代誌按怎講:記者問台北市長柯文哲,伊應講:恁去問韓國瑜。Chit-ê人聽講有想beh選2020年總統neh!四月初一,記者問高雄市長韓國瑜,伊表示chit-má家己歸頭殼攏干單teh想講beh按怎賣柭仔。Chit-ê人聽講是中國國民黨主席吳敦義一直beh扶伊出來選總統的人。四月初二,吳敦義主席呼籲蔡政府tio̍h和平對待中國。咱m̄知,吳主席的意思是m̄是講蔡政府tio̍h請解放軍戰鬥機入來台灣奉茶一下?   

好佳哉!Chiah呢霸氣的蔡英文,正是咱的總統!