蔡英文政府hō͘人民減稅、免稅!
Written by 李南衡   
Wednesday, 15 May 2019

有一個中國國民黨的政治人物做代誌無半phiat,干單出一枝嘴會曉講beh hō͘ 人民發大財、kah隨便罵人niā-niā,頂日伊罵講:民進黨執政期間,真濟民眾過kah真艱苦。其實是全世界無論叼一國攏有真濟人過kah真艱苦,特別是低收入的一大群人,台灣無例外,確實有一大群低收入的人khah歹過日。佇政府猶無法度hō͘ in增加收入進前,in除了儉腸neh肚、減少開銷以外,實在無koh khah好的辦法。但是一個好的政府會去想tio̍h chiah-ê人,按怎hō͘ in減少開銷,上好的辦法tio̍h是想盡辦法減少、免除人民的稅金,會tàng hō͘低收入的人民喘一個大氣。前幾年咱有聽tio̍h減免遺產稅的政策,總是he只不過是針對真小部分的人。今年蔡英文政府大出手,hō͘大部分的散鄉人、低收入的人減稅、免稅,蔡英文政府會使講是台灣三百年來頭一個。

一個單身仔歸年的收入,舊年是三十萬六千免稅、今年提懸到四十萬八千免稅、兩年差額十萬兩千元、省稅金五千一百元;兩翁某攏teh食頭路年收入八十一萬六以下免稅,若是有兩個五歲以下的子女也就是一家四口,年收入一百二三萬二免繳稅。kah舊年八十三萬八免繳稅比,相差304,000元,稅額差19,700元。三代同堂家庭(一家六口,父母超過七十歲tio̍h領有身障手冊、兩個五歲以下子女),兩人收入135.8萬以下免繳稅,比舊年差53.8萬,以5%稅率計算減稅2.69萬。個人綜合所得稅,今年上懸稅率ùi舊年的45%降到40%,四大扣除額有調懸,標準扣除額ùi 9萬調懸到12萬、薪資所得特別扣除額ùi 12.8萬調懸到20萬、身心障礙特別扣除額ùi 12.8萬調懸到20萬、糼兒學前特別扣除額ùi 2.5;萬調懸到12萬。基本生活費差額ùi 16.6萬調懸到17.1萬。股利所得課稅新制,納稅人會使採用合併抑是分開計稅兩項選一項。健保費扣除規定放寛,「被保險人」kah「要保人」無需要佇仝一個申報戶內,無論kah被保險人是m̄是仝一個申報戶,伊的健保費攏由納稅義務人申報扣除。  

 今年新制的稅法會tàng hō͘低收入的個人kah家庭減稅、免稅,當然tio̍h kā蔡英文政府謳咾拍phok-á,但是mā有咱小百姓感覺奇怪的所在,像講一家六口三代同堂的家庭,兩翁某kah兩位年老七十歲以上的父母做夥生活,是按怎父母tio̍h koh有身障手冊咧?有身障手冊m̄是小可代誌neh!兩個糼兒攏tio̍h五歲以下才會使得,一個三歲一個六歲,所得稅beh按怎申報?   

咱除了感謝蔡英文政府以外,mā期待in繼續拍拚減免人民稅金,咱koh khah期待in拚勢興利,會tàng hō͘人民增加收入,按呢chit-ê政府tio̍h滿分!