顧守無hō͘「秋行軍蟲」來,保護台灣農業!
Written by 李南衡   
Wednesday, 22 May 2019

今年一月,中國雲南省發現tio̍h「秋行軍蟲」,短短三個外月的五月初八,已經有雲南、廣西、廣東、貴州、湖南、海南、福建、浙江、湖北、江西、四川等十一個省(區)、五十二個市(州)、230個縣(市、區)的番麥受害。速度緊kah超出人的想像。

聯合國糧農組織(FAO)預先有警告chit-ê農業的害蟲「秋行軍蟲」,伊mā叫作「草地貪夜蛾」,伊會危害八十外種的植物,食量足大、繁殖能力足強,飛得遠koh緊,所以擴散tio̍h真緊,伊差不多無天敵,對真濟種農藥有抗藥性。Chit種害蟲原本佇美洲的熱帶亞熱帶地區,對番麥的危害上重大,嚴重的時會tàng kā歸個番麥園食kah臭腥荒。2016年頭一遍入侵非洲西部造成災害,2018年對非洲造成的損失約美金十億至三十億,番麥拍損的面積約6%,2018年七月頭一遍傳入來亞洲地區。五月,「秋行軍蟲」已經佇中國境內建立種群,湠tio̍h緊koh闊,為害大、監控難,專家預料熱天了後,蟲災會ùi華南番麥區向長江中下游、黃淮平原、華東、東北kah西北地區湠開。   

「秋行軍蟲」恐怖的所在有下面幾點:第一無揀食koh真gâu食,會食八十外種的植物。第二特別gâu生,一隻母蛾一遍會tàng生一百至兩百粒卵、一生會tàng生九百至一千粒卵,每粒卵兩三禮拜後tio̍h變作一尾細尾蟲。伊的平均壽命約兩禮拜。第三特別gâu飛,一暗會tàng飛一百公里,母蛾生卵前會tàng飛五百公里。第四造成損害特別緊,gâu食koh集體行動,一工會tàng kā一大片番麥園食kah寸草不留,食了隨時遷徙去下一坵番麥園,所以才會叫作「行軍蟲」。第五破壞性特別大,到目前為止,「秋行軍蟲」無天敵,幾十年來ùi美洲出發,經過非洲到亞洲,經過幾十國幾十種農藥打搫,對真濟種農藥已經有抗藥性ah!   

農委會防檢局長馮海東表示,咱tio̍h防範「秋行軍蟲」tòe風直接飛來金門kah馬祖,咱hia有種高粱、小麥等作物kah雜草,攏是「秋行軍蟲」上愛食的植物。一旦hō͘ in入侵,咱有準備好各種殺蟲劑beh kā消滅掉!   

五月十四,蔡英文總統佇面冊頂面講伊有指示,tio̍h強化邊境顧hō͘ tiâu,防範當佇中國生湠的「秋行軍蟲」來台灣。行政院長蘇貞昌特別要求海關、各種船隻、機具tio̍h嚴格消毒防疫,絕對bē使hō͘當佇中國chit群為害農業的「秋行軍蟲」抑是蟲卵入來!那親像對付中國的非洲豬瘟hiah呢拚勢仝款,咱tio̍h拍拚顧守無hō͘「秋行軍蟲」來,保護台灣農業!