外交交託蔡英文總統koh拚落去!
Written by 李南衡   
Wednesday, 05 June 2019

 1949年十月初一,中華人民共和國成立了後,世界差不多有一半的國家承認伊是唯一代表中國的政府,猶有一半的國家承認佇台灣的中華民國。1971年,包括美國在內的有真濟國家希望咱政府會tàng接受「兩個中國」的方式,那像兩個德國平平佇聯合國內底。當時的蔣介石總統堅持「漢賊不兩立」的原則,十月二五日《聯合國大會2758號決議案》,佇台灣的中華民國政府tio̍h退出聯合國,一寡國家決定kah中華民國政府斷絕外交關係。

原本tio̍h kah咱斷交的國家內底,1950年咱佇英國設立「自由中國新聞處」,1963年改名作「自由中國中心」;1956年咱佇西德設立「自由中國新聞社」,1972年改名作「遠東新聞社波昂總處」;1972年咱佇法國設立「法華經濟貿易觀光促進會」,是「法華經濟」kah佛教的「法華經」無關係。  

 Tī咱退出聯合國以後才koh重建立的外館,像講1972年咱佇瑞典設立「瑞典臺灣協會」。bē-bái!有看tio̍h「台灣」兩字,1981年那會kiu去改名作「台北商務觀光kah新聞辦事處」咧?1972年咱佇印尼設立「駐雅加達中華商會」;1973年咱佇阿根廷設立「臺灣商務辦事處」,猶有「台灣」兩字。仝一年咱佇西班牙設立「駐西班牙孫中山中心」;咱佇奧地利設立「中國文化研究所」;1975年咱佇巴西設立「駐巴西遠東貿易中心」,1980年改名作「駐巴西臺北商務中心」;1975年咱佇泰國設立「華航代表辦事處」,1980年改名作「駐泰國遠東商務處」;1978年咱佇荷蘭設立「駐荷蘭孫逸仙中心」,第二年改名作「駐荷蘭遠東商務辦事處」,那像是遠東百貨公司的辦事處咧!1979年咱佇瑞士設立「駐瑞士孫逸仙中心」。佇chiah-ê國家奇奇怪怪的外館名稱,攏tī李登輝總統執政期間的1990年代,改名作「某某國臺北經濟文化辦事處抑是代表處」。   

全世界二百國kah咱關係上深的是日本kah美國。1972年台灣日本斷交了後,日本設立「財團法人交流協會」。2017年正月初一,「財團法人交流協會」改名作「日本台灣交流協會」。今年五月二五,「北美事務協調委員會」宣布,beh正式改名作「台灣美國事務委員會」。日本kah美國相續正式用「台灣」chit-ê名,咱當然tio̍h感謝現任前任的代表,mā tio̍h特別感謝包括美國“FAPA”在內的台灣人團體kah真濟個人的努力。咱特別beh提起,che攏是蔡英文總統任內三年的外交成果。咱應該hō͘蔡英文總統koh拚一任四年,看會tàng由日本、美國chhōa頭kah台灣建立正式外交關係,互派大使。   

咱足愛kā外交交託蔡英文總統koh拚落去!