阿Q無死!
Written by 李南衡   
Thursday, 13 June 2019

咱一般台灣人知影Q是啥物人,有小小介紹的必要。Q1920年代中國作家魯迅所創造出來的一個虛擬的人物。伊所寫的《Q正傳》ùi 1921年十二月初四開始佇北京《晨報副刊》刊出,一直到1922年二月十二刊完,也tio̍hhitQ hông銃殺死去。真濟愛讀者真Q hiah早死。

那會有hiah呢濟讀者愛看《阿Q正傳》咧?因為in那像佇阿Q的身上看tio̍h家己。Che tio̍h是魯迅一直hông佩服尊敬的所在。魯迅kā五千年來中國人所累積起來的民族性jio̍k-jio̍k作一丸,捏造出一個阿Q來。阿Q上主要的精神kah性格有幾項:第一是精神勝利法,「伊付了酒錢,心內不平倒落去,後來tio̍h想:『現在的世界真亂來,後生拍老父……』伊忽然間想tio̍h趙大爺的威風,taⁿ伊是我的後生ah,想tio̍h mā漸漸得意起來。」第二是欺負善良驚惡人。伊抵tio̍h討厭的王鬍-ē,hông拍也m̄敢kē手,伊tng teh激心的時,看tio̍h小尼姑ùi hit旁行來,伊tio̍h kā戲弄一下,弄kah逐個攏teh笑,伊心情才爽快起來。  

 照魯迅所寫的阿Q早早ti 1922年二月十二tio̍h死去ah,事實上chit九十七年來,阿Q佇中國愈生湠愈濟,chit陣佇中國有的阿Q teh作官作領導,有的阿Q teh教冊,有的阿Q teh搬戲唱歌,有的阿Q teh作外交官,有的阿Q teh作將軍。上界濟阿Q teh作老百姓、干單會曉tòe人講tòe人喝。  

 最近中國網路kah卡拉OK足流行一首戰歌《貿易戰》,歌詞有幾節誠厲害:貿易戰heh貿易戰/m̄驚in横霸來挑戰。太平洋頂展開了貿易戰/一帶一路連作片連作片。惹事的伊若敢拍/拍kah伊頭眩目暗/惹事的伊若敢拍/拍kah伊身魂飛、膽mā chhoah。兵來將擋/水來土掩/kā惹事的徹底打péng過。貿易戰heh貿易戰/華夏兒女千千萬/heh,同心一致拚敵人/一手掠發展/一手來應戰/m̄惹事m̄驚事/展開了貿易戰。莫怪英國廣播公司(BBC)會滾笑講:中美貿易戰,愛國歌曲已經成作中國的新武器。  

 中國佇貿易戰hō͘美國「電」kah mi-mi mauh-mauh,干單五月初十起,美國對中國進口的兩千億產品,進口稅ùi 10%調懸至25%,美國一年tio̍h會增加美金一千億的收入。六月初六,美國Trump總統koh放聲講:若有必要,會koh對中國至少美金3,000億的產品加徵關稅。  

 你若干單聽貿易戰chit首歌,你有可能想講中國佇貿易戰頂面實有夠勇。因為he是阿Q做hō͘ koh khah濟的阿Q唱的、愈唱愈勇,唱hō͘ koh khah濟的阿Q聽的、愈聽愈爽!  

 阿Q無恐!十幾億的阿Q那死會完?